A janë Berisha me Vasilin, dy të paralajmëruarit e mëdhenj të ambasadores Kim?

Ambasadorja amerikane në Tiranë, Yuri Kim, ka shkuar këtë të mërkurë në Elbasan, ku ka zhvilluar takime me drejtuesit politik të këtij Qarku, Taulant Balla, Gazmend Bardhi dhe Monika Kryemadhi.

Nuk dihet pse Kim zgjodhi Elbasanin, kur mund të shkonte edhe në ndonjë qytet tjetër, si fjala vjen Durrësi apo Shkodra, në qarqet e të cilave gara për 25 prillin pritet të jetë shumë më e ashpër.

Interesant është fakti se vetëm një natë më parë, kandidati i LSI-së në Qarkun e Elbasanit, Sokol Skura, u denoncua nga Fiks Fare se bënte pazare për shitblerje votash.

Në videon e publikuar nga Fiks Fare nuk flitet me çmime konkrete, por dëgjohet vetë kandidati Skura të pohojë se çmimin do e vendosi e do e ngrejë sa të dojë ai.

Skura ndërkohë u arrestua disa ditë më parë nga policia pasi u kap i dehur duke drejtuar makinën.

Më pas u la i lirë.

Ky rast, i pari në këtë fushatë, ndoshta mund ta ketë detyruar ambasadoren që të shkojë pikërisht në Elbasan, pikërisht për të dhënë mesazhet e saj.

Ambasadorja amerikane paralajmëroi ndërkohë se disa emra nga listat e shpallura për deputetë mund të përjashtohen që aty, pasi sipas saj nuk është ndjekur kriteri i përcaktuar nga SHBA. Fjala është për ata që Departamenti i Shtetit i trajton si persona “non grata”.

“E di që disa persona mund të thonë ‘është e përcaktuar në bazë të ligjit të SHBA por nuk është i dënuar’, dhe në fakt, njerëzit me logjikë të thjeshtë do ta kuptonin se është një evidencë që mungojnë faktet por për shkak të boshllëqeve në ligjin shqiptar.

Kjo nuk ka lidhje nëse SHBA pëlqen apo jo dikë. Kjo ka të bëjë me faktin se Sekretari i Shtetit ka përcaktuar që ky person përbën kërcënim për SHBA. Ka ardhur koha që votuesit shqiptar të mendojnë se përbëjnë rrezik edhe për shtetin shqiptar”, tha Kim në një deklaratë nga Elbasani.

Po cilët janë këta emra?

Kim ju afrua konkretes por gjithsesi pa emra konkretë:

“Ka 3 njerëz që Sekretari i Shtetit të SHBA ka përcaktuar nuk do i përmend emrat e tyre dhe nuk do dalin nga goja ime, por mund ju mund t’i shihni dhe t’i gjeni”.

Njëri dihet, pasi vetë ambasadorja e ka përmendur edhe me emër: Tom Doshi.

Dy të tjerët ajo nuk i përmendi, por mund të spekulohet.

Kush janë dy kandidatë, të cilët nuk mund të udhëtojnë dot në SHBA?

Për momentin, vetëm Sali Berishën dhe Petrit Vasilin dimë publikisht.

Ta ketë pasur për këta të dy ambasadorja?!

(TemA)