Këto janë pamje që i hasim thuajse në çdo ambient të përditshmërisë tonë. Tashmë pjesë e pandashme e jetës, teknologjia ka prekur të gjitha grupmoshat e në veçanti të vegjlit, duke lëkundur ekuilibrat tradicionalë të marrëdhënieve fëmijë-prind.
Vetë këta të fundit, pohojnë se shpesh për shkak të punës, mungesës së aktiviteteve të tjera sociale, apo pamundësisë, lejojnë që fëmijët e tyre të kalojnë më shumë kohë seç duhet në telefon, por pa mohuar edhe ndihmën që këto pajisje kanë sjellë në zhvillimin e tyre.
E ndërsa teknologjia ofron mundësi të shumta për edukim e argëtim, ajo gjithashtu sjell sfida dhe rreziqe.
Nisur nga efektet që pajisjet elektronike sjellin te moshat e vogla, ekspertët mbajnë qëndrime të ndryshme sa i përket raportit që fëmijët duhet të kenë me to.
Logopedi Spiro Saqellari, është i mendimit se, të paktën në Shqipëri, këto pajisje digjitale po çojnë në humbjen e rolit që ka prindi. Sipas tij pasojat negative mbizotërojnë mbi të mirat që teknologjia mund të sjellë duke vendosur theksin te rastet e shtuara të spektrit autik.
Nga ana tjetër edhe për sociologun Gëzim Tushi teknologjia është tashmë pjesë e përditshmërisë dhe ajo nuk duhet fajësuar. Sipas tij është në dorën e prindit, që pajisjet teknologjike të shihen si mjet edukimi e zhvillimi për fëmijën.
Sipas raportit të fundit të UNICEF në Shqipëri, mosha mesatare kur fëmijët hyjnë për herë të parë në internet është 9 vjeç, madje 1/3 e tyre ka akses edhe më herët.
