Presidentja e Komisionit Europian, Ursula von der Leyen, kishte deklaruar të mërkurën se aplikacioni për verifikimin e moshës “është gati” dhe se tani “nuk ka më justifikime” për platformat që të mos e përdorin.
Koha e këtij njoftimi ishte përshtatur edhe me videokonferencën e organizuar dje nga presidenti francez Emmanuel Macron mbi moshën minimale për akses në rrjetet sociale.
Por aplikacioni i von der Leyen nuk duket se është kaq gati sa u prezantua. Një këshilltar i sigurisë kibernetike, Paul Moore, publikoi në X një video me udhëzime që tregojnë se si aplikacioni mund të hakerohet “në më pak se dy minuta”.
Sipas disa ekspertëve, ekzistojnë edhe dobësi të tjera në modelin e aplikacionit të publikuar nga Komisioni Europian, i cili synon të përdoret nga autoritetet kombëtare për ta integruar në portofolët e tyre elektronike ose nga zhvillues privatë për krijimin e aplikacioneve të verifikimit të moshës.
Një zëdhënës i Komisionit ka deklaruar se këto dobësi “i referohen një versioni të mëparshëm demo dhe jo versionit të prezantuar të mërkurën”.
“Versioni demo u prezantua vitin e kaluar, pikërisht për qëllime testimi dhe zhvillimi. Ne e kishim identifikuar atë dobësi në versionin demo dhe e kemi korrigjuar në versionin final”, tha zëdhënësi.
“U bëj thirrje të gjitha shteteve anëtare që të fillojnë ta përshtatin aplikacionin tonë në mënyrë që qytetarët ta përdorin sa më shpejt. Ky mjet do t’i ndihmojë prindërit të mbrojnë fëmijët e tyre në të gjitha platformat”, tha dje von der Leyen.
