A do ta mbështesë Vetëvendosje Vjosa Osmanin për një mandat të dytë?
Sot Kryeministri i Kosovës, Albin Kurti, nuk dha një përgjigje të drejtpërdrejtë, por theksoi se aktualisht nuk kanë mbledhur nënshkrime për asnjë kandidat.
Pas takimit me kreun e LDK-së, Lumir Abdixhiku, Kurti tha se edhe në rastin më të mirë, Vetëvendosje me partnerët mund të sigurojë vetëm 66 vota, një shifër që mbetet larg 80 votave të nevojshme për zgjedhjen e presidentit në dy raundet e para.
“Ne nuk kemi mbledhur nënshkrime për askënd, sepse edhe nëse i mbledhim mund të arrijmë në numrin 66. Nuk e mbërrijmë dot 80-shin. Mund të nxjerrim kandidat, por 66 është shumë larg 80. Është e dëmshme të nxjerrim kandidat kur kemi ngelur te numri 66”, tha Kurti.
Ai shtoi se edhe dy subjektet e tjera të mëdha kanë deklaruar se nuk i kanë as 30 vota për nënshkrime, duke lënë të hapur nevojën për marrëveshje më të gjerë politike nëse do të ketë një emër që kalon pragun kushtetues.
