Pas “Dashnores së fundit”, një bar që tanimë është shumë i njohur në qytetin e Pogradecit për nga emër tjetër po kërkon t’i japë pak famë këtij qyteti. Por këtë herë, njerëzit po abuzojnë me emrin e shkrimtarit të madh Lasgush Poradecit. A e dinit që ka një pije që ka marrë emrin e shkrimtarit? Po, madje edhe është konfirmuar nga autoritetet e vetë qytetit të Pogradecit.
Ja se çfarë shkruan Marie Gusho, e bija e Lasgush Poradecit për këtë ngjarje:
“Në guidën e qytetit të Pogradecit, “Pogradeci çelësi turistik”, (shqip-anglisht), hartuar nga Bashkia e qytetit Pogradec, për botimin e të cilës janë shpenzuar rreth 40 milion lekë të vjetër nga fondet e Bashkisë, në faqen 50 lexova:
“Pasi shetiste buzë liqenit, Lasgush Poradeci ulej tek hoteli i madh dhe bënte një porosi të veçantë. Vetëm pasi e merrte atë, ulej dhe shkruante mbi blloqet poezitë që e bënë të famshëm. Porosia e tij ishte: dy gota raki e fortë rrushi perlë e përzier me ujë të ngrohtë dhe pak sheqer. Që nga koha kur e pinte Lasgush Poradeci kjo lloj pije u quajt nga kamarjerët e vjetër ‘Ponçi Lasgush’… Provojeni njëherë, mbase me anën e tij mund të zbuloni talentin tuaj të fshehur prej shkrimtari. “Ponç Lasgush”, i shoqëruar me një kafe të fortë turke, bën mirë si në mëngjeset e freskëta anë liqenit gjatë verës, ashtu edhe në ditët e ftohta me dëborë. Sot në Pogradec të gjitha lokalet ia dinë formulën kësaj pijeje të veçantë….”
Të gjitha sa shkruhet këtu nuk janë të vërteta, janë gënjeshtra të sajuara nga mendje diabolike cinike që dinë çmimin e çdo gjëje dhe vlerën e asgjëje. Dua t’ju them këtyre manipulatorëve sa të merren me këto pazare lokalesh, të merren me atë çfarë Lasgushi është në të vërtetë për këtë qytet, pasi Biblioteka e Pogradecit, kurrë nuk është interesuar për veprat e tij, Bashkia kurrë nuk është interesuar për shtëpinë e tij muze dhe pushtetarë mbrojnë dhe favorizojnë vjedhësit e pronës së tij”.
Thënë ndryshe kjo është për disa si një përrallë me pak magji brenda, për të tjerë është marketing, por për historinë e letërsisë, shtrembërimi apo publikimi i të tilla gënjeshtrave duket disi i rëndë.
Luela Myftari
