Kreu i Lëvizja Bashkë, Arlind Qori, ka folur hapur për ambiciet e tij politike dhe për kandidimin si kryetar i Bashkisë së Tiranës.
I ftuar në emisionin “Studio Live” me Ermal Qorin, Arlind Qori ka treguar se do të ketë një kandidat nga partia e tij, por se kush, atë do ta vendosë Këshilli Koordinues, por ai tregon se nuk do ta refuzonte si propozim.
“Do të kemi një kandidat, po se kush do të jetë është këshilli koordinues i ‘Lëvizjes bashkë’ që do të vendosë. Unë jam gati të marrë çdo detyrë që më ngarkohet”, tha ai.
Ndër të tjera, Qori komentoi dhe emrat e zgjedhur nga kryeministri Rama për formimin e qeverisë së re, duke u shprehur se secili prej tyre është direkt i varur nga kryeministri.
“Si mund të bëhesh ministër ti pa e ditur. Këta njerëz nuk kanë personalitet politik, janë të dobët, të varur për karrierën e tyre nga Edi Rama, sa praktikisht nuk ekzistojnë. Ministri është një figurë politike, jo një administrator i mirë i një fushe”, tha Arlind Qori.
Deri më tani për Bashkinë e Tiranës, vetëm një kandidaturë është bërë zyrtare, ajo e socialistes Ogerta Manastirliu. Ende nuk ka emra nga kampet e tjera politike, ndërsa mbetet për tu parë se kush do të garojë përballë Manastirliut për vendin e drejtuesit të Tiranës.
