Kryeministri i vendit, Edi Rama, teksa ka vizituar të plagosurit e tërmetit në Spitalin e Trumës, ka folur para mediave, ku tha se nata e djeshme ishte nata më e keqe për të gjithë kombin shqiptar. Ai përgëzoi të gjithë strukturat që kanë dhënë ndihmë në terren, por edhe përpjekjet heroike të bluzave të bardha, të cilat me orë të tëra dhe pa pushim po punojnë për të shpëtuar jetën e të plagosurve.
I pyetur nëse do ta shpallë gjendjen e jashtëzakonshme, numri një i qeverisë thotë se këtë vendim do ta marrë nesër.
“Është e çuditshme që e dëgjoj këtë pyetje nga mëngjesi deri në darkë, nuk ka kuptim sot, cfarë do të thotë? Akti formal i gjendjes së jashtëzakonshme nuk është se sjell më shumë sesa ka sjellë. Natyrisht nesër është dita për të menduar të gjitha edhe këtë që po thoni ju, nejse, ju jeni të pafajshëm, të fajshëm janë ata që vijojnë të cysin edhe sot. Ne do i vlerësojmë të gjithë, por një gjë është e sigurt, këta njerëz do të trajtohen në mënyrë dinjitoze nga strehimi. Nuk kemi pasur kohë të mendojmë për aspektet formale, kemi dhënë dhe po japim gjithçka. Ditën dhe natën nuk jemi Franca, Gjermania, as Greqia dhe Italia që kanë eksperienca të gjata në këto sfida, por më lejoni të jem mirënjohës”, u shpreh kryeministri Rama. /e.s/
