Ish-presidenti Bamir Topi nuk e sheh ndonjë përplasje në lidhje me formimin e qeverisë së re dhe me dekretimet. I ftuar në emisionin “Top Talk” thotë se pavarësisht se mazhoranca, apo Kuvendi ka votuar për shkarkimin e Metës, ai ka një koracë të fortë, pasi vendimin e fundit e thotë Gjykata Kushtetuese.
“Mazhoranca e ka shkarkuar duke përdorur instrumentin e Parlamentit, me vullnet politik, por nuk mjafton. Edhe pse presidenti shkarkohet ka një instrument Gjykatën Kushtetuese, e i jep mbrojtje të fortë.
Kjo është arsyeja që kemi një president të shkarkuar politikisht, por e mbron institucioni. Sot është një president me të gjitha fuqitë”, deklaroi Topi.
Sipas tij, Meta është i detyruar që të zbatojë Kushtetutën, duke nënkuptuar se nuk bëhet dot pengesë.
“Janë të detyruar për shkak të detyrimeve kushtetuese për të realizuar detyrën. Askush nuk mund të jetë bllokues në këtë proces.
Që të futem në kostumin e presidentit gjithçka do të shkojë normalisht. Nuk jemi në kulminacionin e përplasjeve politike”, shprehet Topi.
