Basha: Rama po “pastron” partinë nga Blushi dhe koalicionin nga Meta, protesta për largimin e qeverisë

Kryetari i Partisë Demokratike Lulzim Basha, i ftuar në emisionin “Studio e Hapur”, e Eni Vasilit, në News 24, ironizoi turin e Kryeminnsitrit ‘të pastrojmë Shqipërinë’, teksa tha se Rama po pastron partinë nga Blushi dhe koalicionin nga Meta. Përballë gazetares Vasili, Basha tha se vendi duhet të shkojë në zgjedhje të parakohshme, të cilat sipas tij duhet të përgatiten nga një qeveri teknike. Ai ftoi të gjithë qytetarët t’i bashkohen protestave të opozitës për të larguar qeverinë aktuale, që sipas Bashës është e zhytur në krim.

Eni Vasili: Të nderuar teleshikues mirëmbrëma dhe mirëserdhët në Studio e Hapur. I ftuari i ditës është kryetari i opozitës Lulzim Basha. Mirëmbrëma, mirëserdhët, faleminderit që jeni me mua!

Lulzim Basha: Faleminderit për ftesën Eni!

Eni Vasili: Faleminderit që pranuat edhe ju ftesën tonë. Në fakt herën e fundit që keni qenë këtu keni qenë në fushatë elektorale në mos gaboj, por duket se nuk ka mbaruar fushata për ju. Është e vërtetë kjo apo thjesht një perceptim?

Mendoj se problematika e Shqipërisë është e tillë, që dikton një opozitë aktive, dinamike, denoncuese dhe propozuese dhe intensiteti i denoncimeve tona si dhe nga ana tjetër fillimi i shpalosjes së programit tonë për ta nxjerrë vendin nga kriza me siguri japin përshtypjen se fushata është në vazhdimësi dhe ndoshta është në vazhdimësi sepse e tillë është nevoja. Nevoja është për shqiptarët të ndërgjegjësohen, të vetëdijesohen dhe të bëhen gati për të marrë edhe njëherë fatet e vendit në duar duke zgjedhur në mënyrë demokratike një rrugë tjetër, duke iu dhënë edhe njëherë shansin të zgjedhin një rrugë tjetër për të dalë nga kjo krizë. Përfitoj nga rasti t’ju bëj thirrje gjithë shqiptarëve të bashkohemi më datë 8 dhjetor, që është një datë simbolike, data e lirisë, dita e rinisë, dita kur rinia u ngrit dhe i priu lëvizjes studentore që çliroi Shqipërinë nga frika, nga ankthet, nga diktatura e regjimit komunist por tashmë për t’u bashkuar për t’u çliruar nga një tjetër diktaturë: nga diktatura e krimit, nga diktatura e korrupsionit, nga diktatura e injorancës dhe e arrogancës. Për t’ju thënë që ashtu siç zbuluam që liria ishte në mesin tonë, ne duhet vetëm ta kërkonim dhe ta fitonim atë, po kështu zhvillimi, resurset për zhvillim, resurset për mirëqenie, për paga të larta, për punësim, për dinjitet, për integrim janë brenda nesh, ne duhet t’i çlirojmë. Por duhet t’i çlirojmë nga një kuçedër që i ka marrë peng, që është kuçedra e korrupsionit dhe e krimit të ngritur në sistem nga qeveria e Edi Ramës.

Dakord e kuptoj edhe metaforën e krahasimit, por janë dy gjëra të ndryshme po të kemi parasysh që bëhej fjalë për një regjim diktatorial dhe një regjim që ka ardhur me votë të lirë dhe me shumicë apo jo.

Pa pikë dyshimi dhe nuk është kontestuar asnjëherë as Lulzim Basha as nga PD por pyetja qëndron kujt ia merrte mendja dy vite më parë, tashmë kanë hyrë në vitin e tretë se një qeveri e ardhur me votë popullore pas paketës së premtimeve me të cilat doli para shqiptarëve do të përfundonte në këtë farë derexheje ku është katandisur qeverisja dhe do ta sillte vendin në këtë kolaps ekonomik, shoqëror dhe psikologjik ku ka ardhur Shqipëria sot.

Qëndrojmë tek 8 dhjetori. Ky marshim, kjo protestë nuk është thjesht një marshim përkujtimor për këtë datë të rëndësishme, por është fillimi i një plani të PD­së për largimin e qeverisë?

Aspak nuk është vetëm përkujtimor. Sigurisht data ka peshën e vetë historike për shqiptarët, është data ku ndahet historia e Shqipërisë me atë të regjimit diktatorial dhe me atë të lirisë, të hapjes së Shqipërisë por thirrja nuk është për të ardhur thjesht në një përkujtim por për të ardhur në një lëvizje aktive politike për t’u bashkuar pa dallimet politike. Thirrja nuk u drejtohet vetëm mbështetësve dhe votuesve të opozitës, por të gjithëve me qëllim që t’u japim mundësinë qytetarëve shqiptarë përmes një përballjeje qytetare demokratike që edhe njëherë të vendosin me votën e tyre për alternativat e nxjerrjes së vendit nga kriza.

Me votën e tyre në 2017­ën, se me votën e tyre në marshim dhe në protestë… Me votën e tyre një orë e më parë sepse koha nuk pret më. Koha nuk pret më! Zullumi i kësaj qeverie…

Një orë e më parë, zgjedhje të parakohshme? Që t’i vëmë pikat mbi i dhe t’i themi gjërat qartë, mos t’i lëmë vend interpretimeve apo jo zoti Basha?

Shumë e drejtë. Cili është propozimi që ne si opozitë ju japim sot shqiptarëve. Gjendja ekonomike në vend është alarmante. Unë e shoh këtë, e prek ditë për ditë, nuk ka nevojë të lexoj statistikat, por i kam sjellë edhe statistikat. Statistikat e qeverisë shqiptare, të BB­së, të FMN­së, të Komisionit Europian. Të gjitha flasin për shpunësim, jo rritje të punësimit por humbje vendesh pune, flasin për rënie të kreditimit të ekonomisë, flasin për rënie të investimeve të huaja, flasin për rritje taksash, rritje çmimesh, ulje të fuqisë blerëse, thellim të varfërisë, shtim të numrit të të papunëve , pra çdo indikator i mundshëm ekonomik është pikiatë. Por përtej konstatimeve me shifra ajo që unë shoh dhe prek dhe ndiej në mënyrë të përditshme kur ndodhem në mes të qytetarëve apo kur i pres në zyrë, apo kur komunikoj me ta është një gjendje këlthitëse. Shprehja që dëgjoj më shpesh është jemi bërë për të folur me vete. Njerëzit po flasin me vete. Pse jemi në këtë gjendje? Sepse pagat janë ngrirë, pra efektivisht janë ulur sepse inflacioni bën punën e vetë, pensionet vetëm indeksohen, vende pune nuk ka, çmimet janë rritur, faturat janë rritur, gjobat janë rritur, ekonomia është në stanjacion, mundësia e njerëzve për të siguruar, bëhet fjalë për bukën e gojës tashmë, për asnjë luks, për të siguruar nevojat bazike po shkon drejt zeros, pasiguria ndër ata që kanë një vend pune është e madhe, pasiguria në sipërmarrje është edhe më e madhe që reflektohet tek qepenat e mbyllur të shumicës dërrmuese të sipërmarrësve të vegjël, apo tek shkarkimi nga puna masivisht i të punësuarve në sipërmarrjet e mëdha dhe më e keqja është se nuk ka dritë në fund të tunelit. Pse e them këtë? Ja ku e kemi paketën fiskale të vitit 2016, nuk ka asnjë dritë shprese, nuk ka asgjë. Bëhet demagogji me një aspekt të programit tonë që është ulja e taksave, e mori…E kam thënë dhe do ta them prapë, nuk është kjo vjedhja më e madhe e Edi Ramës, batërdia që ka bërë me CEZ­in, me tenderët, me koncesionet, ato janë vjedhje. Për këtë madje na vlerëson se thonë që imitimi është forma më e lartë e vlerësimit.

Ju e dini se çfarë ka thënë për kopjimin? Nuk kopjohet nga ai që ngel në klasë, e ka fjalën për zgjedhjet e fundit?

Dakord por në klasë ka ngel ai në 2011-­ën në përballjen direkte, do ta shohim kur të kemi përballjen e ardhshme direkte.

Nuk i quani përballje direkte zgjedhjet lokale?

Sigurisht sepse nuk janë. As ai nuk kandidoi për kryebashkiak, as unë nuk kandidova për kryebashkiak.

Por ju jeni edhe drejtues i opozitës dhe opozita humbi rëndë…

Ajo është çështje interpretimi. Padyshim që rezultati i opozitës nuk ishte ai që dëshironim ne por se çfarë ishin zgjedhjet e 2015­ës, këtë ta ka thënë raporti i OSBE­ODIHR­it. Harta u përgatit për këtë qëllim. Megjithëse këta morën qytetet më të mëdha me dendësinë më të madhe të popullsisë: Tiranën, Elbasanin, Fierin, Durrësin, Korçën, prapë se prapë një kryebashkiak i tyre është zgjedhur me 3 herë më pak vota se një kryebashkiak i yni.

Qëndrojmë tek protesta. Pse i themi të mos i japim më kohë të keqes, çfarë drite ka në fund të tunelit?

Sa i përket korrupsionit vazhdon të shtohet ditë për ditë. Ditë për ditë, opozita dhe ju mediat denonconi afera korruptive qindra milionëshe. Nga ana tjetër çfarë kemi? Kemi rritje taksash këtë vit por jo të ardhurash, pra vjedhje masive. Nuk kemi investime, asnjë investim. Nuk kemi ndihmë sociale, ndihma ekonomike më e ulëta në 10 vite. Po vitin e ardhshëm, sepse kjo më shumë se fjalët e Edi Ramës, më shumë se shëtitjet e tij për të pastruar Shqipërinë, se nga kush i ka mbetur për ta pastruar Shqipërinë, të pastrojë partinë nga Ben Blushi dhe koalicionin nga Ilir Meta se nuk i ka mbetur gjë tjetër. Më shumë se thirrjet flet projektbuxheti që ka sjellë dhe çfarë thotë këtu? Prapë do të rrisë taksat por do të ulë shpenzimet.

Do të ulë edhe borxhin…

Kështu thotë. Jo, jo nuk do të ulë borxhin, do të rrisë me 2.7 miliardë lekë, do t’i harxhojë vetëm për zyra. 27 mln dollarë. Baras me fondin e papunësisë dhe fondin e të përndjekurve bashkë. Pra, sa i përket mundësisë për përmirësim në qeverinë e Edi Ramës, mundësia është zero. Ajo që mund të presim është më shumë abuzim, më shumë rritje taksash, më shumë gjoba arbitrare, më shumë kërbaç, më pak punë, më pak mirëqenie, më shumë korrupsion, më shumë krim dhe lidhje me krimin që e ka renditur sot Shqipërinë një ndër vendet më problematike dhe për pastrimin e parave siç kanë dalë raportet ndërkombëtare. Në këtë situatë çfarë i mbetet qytetarëve? Ju mbetet të marrin në dorë fatin e tyre. Si? Kam qenë fare i qartë dhe jam i qartë. Përmes mundësisë për t’u shprehur me votë, jo në 2017­-ën por një orë e më parë.

Si do ta realizoni ju politikisht këtë gjë zoti Basha?

Politikisht këtë gjë, Partia Demokratike dhe grupi i saj parlamentar është fare e qartë që nuk i kanë numrat ta realizojnë por qytetarët e kanë këtë mundësi.

Çfarë duhet të bëjnë?

Të bëjnë atë që bëjnë qytetarët e lirë, atë që bëjnë qytetarët europianë, qytetarët maqedonas, që bëjnë qytetarët anembanë vendeve ku nuk pranohet keqqeverisja.

Trazira, përplasje sociale, çfarë?

Jo, protestë demokratike pa ndalim, me të gjitha aktet e protestës demokratike.

Pra, me ditë të tëra, pa pushim deri sa të dorëhiqet vetë qeveria, kjo është ideja?

Mjetet pa dyshim ekzistojnë, që nga protesta, që nga mosbindja civile, që nga aktet e protestës.

Kur thoni mosbindje civile..

Pra, thirrja që i bëjmë qytetarëve shqiptarë, është të ndërgjegjësohen që e kanë ata zgjidhjen në dorë. Kjo qeveri nuk ka zgjidhje, nuk ofron zgjidhje, ja ku e keni buxhetin dhe kam shpresë që gjatë emisionit do ta zbërthejmë për të parë që nuk ka zgjidhje, nuk ofron zgjidhje. As për fermerin, nuk do ketë fonde as për vaditje, as për kullim, as për subvencione. Nuk do ketë fonde për rimbursim TVSH-­je, as për të papunët sepse jo vetëm që fondi i papunësisë nuk rritet ndërkohë që papunësia po rritet por nuk ka asnjë shpresë për vende të reja pune as përmes investimeve publike sepse investimet bien në pikiatën më të madhe në 25 vite demokraci. Pra s’do ketë kantiere të reja pune. S’do ketë ndërtim rrugësh, s’do ketë ndërtim ujësjellësish, shkollash, spitalesh. As për ekonominë, sepse edhe ekonomia me këtë paketë fiskale do të ketë një tkurrje. Pra, as për të papunët nuk ka asnjë shpresë. Për të vetëpunësuarit pasiguri për të humbur vendin e punës. Ka taksa të reja në këtë paketë edhe për sipërmarrjen, siç është taksa mbi truallin. Për rininë është e qartë që me ligjin e ri për arsimin, prindërit e tyre duhet të paguajnë tarifa më të larta, pra nuk ka asnjë shans përmirësimi. Duke qenë që kjo qeveri nuk ofron dot zgjidhje për shqiptarët, thirrja ime, thirrja e PD­së është të bashkohemi më 8 dhjetor për t’i thënë Ndal kësaj keqqeverisje dhe për të hapur rrugën për një qeverisje tjetër, padyshim përmes zgjedhjeve demokratike të përgatitura nga një qeveri teknike, e cila të garantojë që ai turp i 21 qershorit të mos përsëritet sepse shqiptarët meritojnë dhe do të kenë patjetër mundësinë të shprehen lirisht me votën e tyre.

Sa do ishte e gatshme kjo qeveri të jepte dorëheqjen, për ç’arsye duke patur parasysh fuqinë e saj politike, në numra, në kuvend?

Kjo qeveri nuk ka asnjë motiv, përkundrazi po bën gjithçka që t’i zgjasë ditët vetes sepse në këtë mënyrë do jetë në gjendje të zgjasë mundësinë për të shpërdoruar, për të vjedhur, për të abuzuar me fondet.

Do ta bënte çdo qeveri, apo jo? Çdo qeveri që ka pushtetin e kam fjalën, parimisht…

Po pra po, por për çfarë po e përdor pushtetin është pyetja? Kjo qeveri interes kryesor ka vjedhjen dhe grabitjen e pasurive të shqiptarëve, vjedhjen dhe grabitjen e pasurive publike. Kur je ulur këmbëkryq në një sofër dhe po vjedh dhe po shpërdoron pasuritë publike, padyshim që është e hidhur të çohesh nga sofra. Vetë mendësia e tyre këtë shpreh. Këta e konsiderojnë Shqipërinë pasuritë publike të shqiptarëve, taksa që mblidhen, mall të babës. Sillen sikur janë në mall të babës jo sikur kanë përpara fatet e qindra, mijëra shqiptarëve.

Një qytetar më pyet, çfarë ka në mend zoti Basha kur thotë mosbindje civile, kur ne na godasin për një kupon të munguar, kur e kemi të pamundur të mos paguajmë taksa, çfarë duhet të bëjmë?

Mosbindja civile është një vegël shumë demokratike e përdorur në disa prej demokracive më të njohura të botës dhe është akti i refuzimit të një qeverie që nuk i përmbahet kushteve me të cilat duhet të qeverisë. Kushtet nuk i vendos qeveria, i vendos populli. Quhet kushtetutë, quhet ligj, quhet shtet ligjor. Kur një qeveri nuk u përmbahet këtyre kushteve kjo qeveri humb legjitimitetin. Kur qeveria është e para që nuk respekton ligjin dhe institucionet, humb legjitimitetin në sytë e qytetarëve. Më konkretisht, kur një qytetari i vihet gjoba apo edhe shoqërohet për në rajon të policisë për një kupon që nuk e ka dhënë, kur ka blerë apo kur ka shitur fjala vjen një kile qepë, apo një berber i cili është burgosur pasi nuk ka lëshuar kuponin kur i ka shërbyer një klienti, nga njëra anë dhe nga ana tjetër kur ke ministrin e brendshëm, i cili për t’i shpëtuar akuzës kur me makinën e tij është bërë trafik droge thotë që makinën e kam shitur por nuk tregon as dokument shitjeje, as dokument të pagesës së taksave, as kupon dhe vazhdon të mbetet ministër i brendshëm atëherë në themel kjo është një qeveri e rënë, është një qeveri e rrëzuar. Ky është prej atyre megaskandaleve që edhe pse qeveria fizikisht mund të ndodhet në zyrat e tyre, në sytë e publikut, në mendjet e njerëzve është një qeveri e rrëzuar moralisht. Në këtë moment lind e drejta për mosbindje civile, manifestimi i së cilës bëhet në të gjitha format dhe mënyrat dhe forma kryesore është ajo e protestave masive si ajo për të cilën bëra thirrje në fillim të emisionit, e 8 dhjetorit në orën 11 në Tiranë.

Pra në qoftë se kjo protestë është popullore, është masive, është aq e madhe sa doni ju, çfarë ndodh pastaj?

Ndodh ajo që ndodh në çdo vend ku qytetarët, populli në fund të fundit është Zot i fatit, nuk është qeveria. Mund të duket sikur është qeveria, por është populli. Qeveria është e deleguara, kujdestarja. Skenarët nuk kanë pse të jenë teorikë. Marr Maqedoninë fqinje, ku qytetarët detyruan politikën të shkojë drejt zgjedhjeve të parakohshme. Me një qeveri të dorëhequr.

Zoti Basha, ju flisni për qeveri teknike. Herën e fundit që kemi pasur qeveri teknike, ka qenë e Bashkim Finos, qeveria e pajtimit kombëtar e 97­ës. Jemi pak a shumë në të njëjtën situatë?

Kemi një diference prej 18 vitesh. Por sa i përket disa aspekteve jemi pothuajse në të njëjtën situatë. Jemi në situatën e një varfërie ekstreme, e cila njësoj si në 97­ën ka provokuar një krizë, një eksod që është më i madh se në 97­ën. Në vlerësimin e statistikave europiane, numri i shqiptarëve, i dyti pas sirianëve tregon që gjendja ekonomike në vend por jo vetëm, gjendja psikologjike e njerëzve, indeksi i besimit se e nesërmja do të jetë më e mirë është në nivelet më të ulëta. Për këtë e krahasueshme me 97­-ën. Piramidat e 97-­ës nuk janë asgjë në krahasim me piramidën financiare që ka ngritur Edi Rama në Shqipëri. Kjo piramidë financiare si metaforë, na shfaqet në dy aspekte, në borxhin që e ka rritur me 1.1 mld euro, 11% të PBB­së, ka marrë për 2 vite borxh. Borxh që është marrë për t’u vjedhur. Sepse nga ana tjetër, kjo është piramida e vjedhjes i janë dhënë 600 mln i janë dhënë vetëm me një dorë CEZ-­it. 777 mln euro flasim gjithmonë, jo lekë, thotë KLSH është shuma e dëmit ekonomik përmes prokurimeve të drejtpërdrejta, korruptive. 326 mln zyrtarisht shifra e parave të vjedhura nga doganat dhe tatimet. I kemi paralajmëruar që prej majit, prillit që ke një gropë që po thellohet në tatime dhe dogana. Kjo gropë vjen prej evazionit dhe kontrabandës në fushën e duhanit dhe të naftës. Greqia dhe Italia u ka dhënë dokumentet. 50 mln dollarë kontrabanda e duhanit. Ky është një sistem vjedhje.

Ju denonconi çdo ditë. Ku e keni fuqinë tuaj sepse pas këtyre denoncimeve nuk vjen asgjë zoti Basha?

Nuk është se nuk ndodh asgjë. Në Shqipërinë e qeverisjes së Edi Ramës dhe Ilir Metës, jo vetëm që nuk ndodh asgjë, por vidhet dhe më shpejt dhe më shumë. Vidhet sikur nuk ka të nesërme. Sepse e dinë që mund të mos ketë të nesërme. Në fakt nuk duhet të ketë të nesërme për një qeveri të tillë, për një bandë të tillë hajdutësh. Nuk ka sot më asnjë dyshim, as tek ata që e kanë mbështetur politikisht ardhjen në pushtet të këtij koalicioni, që kemi të bëjmë vetëm me një bandë hajdutësh. Por durimi ka marrë fund, situata është e papërballueshme. Njerëzit nuk kanë para për bukë, ndaj nuk mund të pritet më.

A jeni gati për zgjedhje të parakohshme, ju keni dalë nga një palë zgjedhje të humbura?

Sigurisht që jemi gati. Kemi dalë nga zgjedhje të kapura dhe të manipuluara . Këtë e ka thënë raporti i OSBE­ODIHR. Me një hartë të kapur dhe të prerë për të shkaktuar humbje në tavolinë të të gjitha bashkive.

Cila është përgjegjësia juaj në këtë pjesë?

Jo nuk është ashtu, sepse përgjegjësia vjen bashkë me mundësinë. Dhe kur nuk të jepet mundësia, të bësh fasadën e një qeverie korruptive dhe kriminale është krim në vetvete dhe unë jam i qetë dhe i kënaqur me vendimin që mora për të mos u bërë pjesë e kësaj fasade që sot ka privuar qytetarët nga shërbimet e pushtetit vendor dhe dalin Dakot me shokë shfajësohen se nuk kanë fonde.

Fillimi i kujt është 8 dhjetori? I një stine protestash, sepse e keni deklaruar herë pas here?

Është fillimi i një përballje pa kthim, midis qytetarëve nga njëra anë bashkë me opozitën dhe asaj që sot është damkosur jo si një qeverisje por si një bandë hajdutësh e bërë njësh me krimin. Pra edhe hajdutëri edhe krim. Shqiptarët nuk e meritojnë këtë qeveri, shqiptarët meritojnë një qeverisje tjetër. Unë nuk flas nga pozitat e Olimpit, nuk them ik ti Ramë se do të vij unë, këtë do ta vendosin qytetarët. Por para qytetarëve PD dhe Lulzim Basha kanë dalë dhe po dalin me një program për nxjerrjen e vendit nga kriza ekonomike, për shpëtimin e ekonomisë kombëtare nga një rrokullisje e përmasave të tjera që do ta bënte 97­-ën më të pranueshme se kjo që po ndodh sot, dhe për një demokraci të re pjesëmarrëse, ku qytetarët të ndihen pjesë e qeverisjes së vendit dhe jo subjekte për tu zhvatur. Kjo është oferta me të cilën ne u themi qytetarëve të heqin dorë nga një qeverisje e diskredituar. Siç është ajo e Edi Ramës dhe Ilir Metës.

A ishte kështu demokracia pjesëmarrëse gjatë 8 viteve që ju keni qenë ministër dhe partia që ju përfaqësoni ka qenë në pushtet?

Mendoj se koncepti që unë kam për demokracinë pjesëmarrëse shkon përtej asaj që Shqipëria ka parë këto 25 vite. Këtu padyshim nuk evokoj asnjë episod të veçantë por evokoj më shumë një ëndërr të shqiptarëve të pabërë realitet, por edhe një ambicie timen dhe të brezit tim biologjik dhe brezit tim në kuptimin e shtresës shoqërore, të rinjve të intelektualëve, të elitës së profesionistëve shqiptarë të cilët kërkojnë një qeveri garantiste të shtetit ligjor, një qeveri të normalitetit, një qeveri të parashikueshmërisë dhe jo një qeveri aventuriere, propagandiste, hajdute dhe të lidhur me krimin. Ky është kontrasti midis aktualitetit dhe një qeverie dhe një demokracie pjesëmarrëse dhe konsultuese në të gjitha nivelet.

Në takimet që keni bërë në të gjithë Shqipërinë, e keni ndjerë që qytetarët e kanë humbur besimin tek politika?

Ka një investim të drejtpërdrejt të Edi Ramës dhe Ilir Metës dhe njerëzve afër tyre që operojnë në media dhe që mbahen me paratë e të dyve, me shuma të majme parash që u jepen një liste personash, do t’i fyeja gazetarët po t’u thosha gazetarë, por që kanë një muskul mediatik korruptiv qeveritar për t’u investuar në dy koncepte. Koncepti i parë, defaktorizimi i opozitës dhe koncepti i dytë, të gjitha janë njësoj, pra shpërndarja e përgjegjësisë. Përgjegjësia nuk mund të jetë e të gjithëve. Domethënë për sa kohë ka liri ka dhe përgjegjësi. Për rritjen e taksave, që është një nga faktorët për rritjen e krizën ekonomikë, s’ka përgjegjësi, pasi ai është Edi Rama. I kemi thënë se rritja e taksave do mbyll bizneset dhe do ushqejë informalitetin. Ky tha jo dhe vazhdoj me rritjen e taksave. Por ne nuk u ndalëm, pasi vazhduam më tej. Ne çuam një amendament në Parlament, ku përtej pozicioneve tona, i thamë shikoni ne jemi serioz për atë që po themi dhe ju sjellim një propozim se si mund të behet kjo pa rritur taksa. I hodhën poshtë pa i vënë në tryezën e debatit, i cili mund të gjenerojë. Një vit më parë interesi ynë nuk ishte të vinim në pushtet, por të ruanin ekonominë shqiptare dhe të shqiptarëve. Rama ka bërë atë që ka dashur.

Shqiptarët nuk janë varfëruar në dy vjet. Pasi në 8 vite është përgjegjësi qeverisje. Nuk mund të themi se faj pse shqiptarët janë të varfër nuk është i Edi Ramës, përgjegjësi keni dhe ju.

Jo nuk e thash këtë. Për çdo gjë le ti rrimë fakteve. Nuk e thash këtë. Duke i atribuuar opozitës deklarata që nuk ka thënë, i shpërehet një kauze të shpërndarjes së përgjegjësitë. Ne nuk kemi thënë se Shqipëria nuk ka qenë e varfër, por se varfëria është thelluar në këto dy vite. 73 mijë veta janë shpunësuar, pasi është trembur leku.

Pasi ekonomia duhej të formalizohej. Ju nuk jeni kundër besoj..

Jo absolutisht. Ne kemi dhënë përmes taksës së sheshtë keni dhënë një kontribut të jashtëzakonshëm në formalizimin e ekonomisë.

Po flas për aksionin kundër informalitet…

Nuk ka aksion kundër informalitet, por një dyfytyrësi. Ka nga njëra anë një vjedhje masive nga Dogana, kryesisht duhani dhe mallrat e akcizës. Nga njerëz që rrinë në kuzhinën e tij, në mënyrë figurative, sepse aty ndajnë paratë, e më pas për të kompensuar këtë hajdutëri që kap 1 milion dollar në ditë është ngritur kërbaçi, mbi fermerët, sipërmarrjen e vogël, mbi berberët. Këto janë të brendshmet e ndyra të Edi Ramës, pasi ka përpjeke për ti hedhur hi syve përmes një ndërmarrje represive që nuk ka sjell asnjë lekë në arkën e shtetit.

(Basha pyet gazetaren Vasili) Ky aksioni kundër informalitetit dini gjë se sa ka sjellë?

Ka një deklarim të qeverisë se sa duhet të sillte.

Po sa ka sjellë?

Atë nuk e di.

Nuk ka sjellë asnjë kacidhe në arkën e shtetit.

Po flisnim për qeverinë, situatën e vështirë ekonomike në të cilën ndodhet vendi, korrupsionin. Juve thatë se ka një korrupsion të jashtëzakonshëm. Herë pas here ju denonconi, si rasti i një koncesioni të madh. Çfarë do bëni nëse kemi zgjedhje të parakohshme dhe ju vini në pushtet?

Kjo është pjesë e alternativës tonë, nuk është pjesë e deklaratës sonë apo time në raport me këtë mega aferë dhe koncesion. Kemi afera të pastra korruptive si chek­up, një vjedhje kriminale dhe horror. Pse? Me 10 milionë euro në vit imagjinoni mund të bëhet me këtë buxhet për t’ju ardhur në ndihmë pacientëve të sëmurë me kancer, diabetikëve, apo shëndetit të fëmijëve, apo urgjencave. Por nuk ndodh kjo sepse këto vidhen, nuk ka chek­up. Mbushin letra falso sikur është bërë chek­up, futen paratë në xhep dhe ndahen me Edi Ramën.

Keni fakte për këtë që keni?

Kemi dhe i kemi denoncuar, Le të pyesim këtu në studio se sa prej 4 operatorëve e kanë bërë chek­up?

Ngrini dorën..Askush… Juve e keni bërë zonja Eni?

Jo, por do ta bëj nuk është diçka që mbaron apo jo?

Është chek­up vjetor por viti mbaroi pra, nuk ka chek­u kjo është një skemë e pastër e vjedhjes së shqiptarëve. Çfarë do të ndodhë? Jo vetëm që do ndalet, por qeveria ime do të bëjë gjithçka për të rikuperuar këto para të vjedhura dhe për të çuar në burg përfituesit e drejtpërdrejtë të këtyre parave, në burg.

Fajin e ka prokuroria atëherë, sepse denoncimet tuaja janë publike. I ka bërë edhe zoti Berisha më parë apo eksponentë të tjerë të Partisë Demokratike në këtë studio…Prokuroria që nuk vepron është faji i gjithçkaje në këtë vend?

E para e punës, sistemi i shtetit ligjor është një sistem i cili vepron në bazë të provave, evidencave dhe procesit të rregullt ligjor. Që të ndodh kjo duhet të ketë disa kushte. Kushti i parë duhet të jetë që qeveria të mos ndërhyjë as në prokurori, as në drejtësi. Por kur ti ke kryeministrin që përflitet si klienti i parë i chek­up, është ai i pari që fut lekët në xhep nga chek­up, çfarë pret ti nga prokurori, nga gjyqtari? Dhe kur kryeministrin e ke në telefon duke kërcënuar gjyqtarin, duke i thënë “të pres këmbët”, duke i folur me gjuhë zuzari, çfarë pret ti nga drejtësia? Pra padyshim që drejtësia është ajo që duhet të bëjë punën e saj dhe një drejtësi që funksionon nuk ka sesi të mos gjurmojë me sukses dhe të evidentojë pasuritë e vëna në mënyrë korruptive nga qeveritarët, por që të ndodhë kjo, pra kjo nuk mund të ndodh me kryepërgjegjësin në krye të punëve. Gjëja e parë që duhet të ndodhë është të paktën ai të mos jetë në krye të punëve. Dhe e dyta, në gjykimin tim duhet një qeverisje e përkushtuar në luftën kundër korrupsionit.

Ai është në krye të punëve dhe ju po uleni në një tryezë të një reforme të rëndësishme siç është reforma e drejtësisë. Duke qenë ai kryeministërt në krye të punës dhe ju do ta firmosni këtë reformë apo jo?

S’po ulemi me Edi Ramën përgjegjës për kapjen e drejtësisë, përgjegjës për vendimet e të njejtit trup gjykues që këtej dënon për shpifje opozitarët që e denoncojnë për lidhje me krimin, të faktuara mediatikisht, ligjërisht dhe botërisht dhe këtej kriminelët që ka sjellë në parlament dhe që godasin opozitarët i lë të lirë. Nuk ulemi me këtë njeri ne. Sigurisht neve jemi në një proces politik me ndihmën e faktorit ndërkombëtar, për ti hequr mundësinë Edi Ramës e Ilir Metës dhe kësaj shumice që të ndikojnë vendimet e gjykatave dhe për ti dhënë mundësi drejtësisë të japë drejtësi të shpejtë e të pakorruptuar për të gjithë qytetarët shqiptarë. Do ishte absurde të mos kishim një proces të tillë. Por ky proces s’mund të jetë kurrë një marrëveshje mes meje dhe Edi Ramës, por është proces i thellë reformues për reformën në drejtësi, i cili…

A po e legjitimoni në njëfarë mënyre pushtetin e Edi Ramës duke u bërë pjesë e një reforme kaq të rëndësishme?

S’mund të them këtë sepse demokracia ka rregullat e veta. Ne jemi një opozitë që pretendojmë të funksionojmë në bazë të rregullave demokratike, pavarësisht se goditja e fundit e zgjedhjeve të 21 qershorit e ka kthyer Shqipërinë në një regjim të paligjshëm, por ne vijojmë të mbështetemi tek rregullat demokratike dhe pjesë e kësaj është edhe përkushtimi i PD për reformën të vërtetë në drejtësi jo për të kapur drejtësinë.

I rikthehemi edhe njëherë turit tuaj, alternativës tuaj dhe asaj ç’ka Lulzim Basha do bëjë nesër nëse…

Pra më pyete për koncesionet?

Po

Pa pikë dyshimi që koncesionet korruptive të Edi Ramës do të anulohen. Dhe në fakt le ta marrin sot nga studioja juaj si një paralajmërim të drejtpërdrejt po të duan edhe me vlerë ligjore. Po, ditën e parë nga qeveria ime këta koncesionarë do të lajmërohen për ndërprerjen e procedurës koncesionare dhe brenda kohës më të shkurtër do inspektohet deri në qindarkën e fundit se çfarë është bërë me këto para. Aty ku këto para rezultojnë të mos kenë shkuar për qëllimet publike për të cilat u deklaruan, do të ketë jo vetëm ndjekje penale dhe vënie para drejtësisë, por edhe përpjekje maksimale për të rikuperuar fondet, për të rikuperuar paratë e vjedhura të shqiptarëve. Ku do ti gjeni? Do ti gjejmë, paraja lë gjurmë, mund të lërë gjurmë si vila, si konto bankare, gjurmët i lë e ne do t’i shkojmë deri në fund. Këto janë paratë e shqiptarëve dhe ne do t’ja kthejmë shqiptarëve. Nëse do të flasim për këtë pjesë të alternativës sime, alternativës së Partisë Demokratike, e them prerë dhe qartë, një nga synimet e qeverisë së drejtuar nga unë do jetë rikthimi i milionave të parave të vjedhura nga Edi Rama dhe banda e tij e 40 hajdutëve

Nuk krijoni me këtë një klime terrori për biznesin? E kam fjalën për biznesin e ndershëm që ofron shërbim, se dikush do t’i japë shërbimet në këtë vend…

Ç’lidhje ka kjo me biznesin e ndershëm?

Duket sikur askush nuk do të afrohet, do ketë frikë…

Po kanë frikë ata, kanë frikë t’i afrohen që tani. E dini ju, se qarkullon edhe në rrethet gazetareske, me siguri e keni dëgjuar p.sh që për të marrë koncesionin e Rrugës së Kombit njerëzit afër Edi Ramës kanë kërkuar 20 milionë dollarë ryshfet.

Kujt ia kanë kërkuar?

Ja kanë kërkuar një kompanie perëndimore, sipas burimeve diplomatike të mirinformuara që kanë informuar burimet gazetareske. Njerëz, edhe njëherë po e them, që para dy vitesh kërkonin ardhjen e Edi Ramës në pushtet. Nuk është as RD dhe as PD që e thotë këtë, janë njerëz, gazetarë, kolegë këtu, të cilët kanë avokatuar ardhjen e Ramës në pushtet dhe që sot raportojnë me trishtim të thellë, me tmerr që vetëm për koncesionin e Rrugës së Kombit një kompanie që është ofruar i është kërkuar 20 milionë dollarë ryshfet. Ky është realiteti, prandaj ka frikë biznesi i huaj të vijë në Shqipëri.

Dakord, por ju thoni që ka një klimë shumë të keqe për biznesin, por a nuk kontribuon edhe kjo deklaratë për çdo koncesion?

Korruptiv? Në mënyrë të plotë dhe të gjithanshme. Kontribuon për të dhënë garanci biznesit të ndershëm që në Shqipërinë e së nesërmes nuk do ketë një praktikë korruptive, që është shkatërruese e konkurencës, që do të përqendrojë fondet e marra nga taksat e shqiptarëve, përfshi taksat e paguara nga biznesi në tërësi e për t’ja dhënë një grushti klientësh që i ndajnë këto para me kryeministrin. Po, këtë garanci ia jap sot ki kryetar i opozitës, si një njeri që kam qenë 10 vjet në shërbimin publik të shqiptarëve. Ju jap sot një garanci që nga i pari deri i fundit çdo tender në korrupsion dhe korruptiv do anulohet. Ne do bëjmë përpjekje për t’ja kthyer këto para shqiptarëve. Bëhet fjalë për 777 milionë këtë vit, vetëm dëmi ekonomik.

Si do të ndodhë, si do të kthehen?

326 milionë vetëm vjedhja në dogana dhe tatime, bëhet fjalë për 1 miliard euro. Imagjinoni ku duhet të ishte sot ekonomia me 1 miliard euro, sa vepra do ishin hapur, sa rrugë do kishin filluar dhe mbaruar, sa spitale, sa vende pune, që të punësoheshin njerëzit.

Si do ti ktheni këto para?

Një nga avantazhet e globalizimit dhe dixhitalizimit është se paraja lë gjurmë. Në kuadër të alternativës sime antikorrupsion ne do të angazhojmë resurset më të mira shqiptare dhe të huaja për të gjurmuar dhe konfiskuar pasuritë e qeveritarëve të korruptuar shqiptarë.

Keni ngritur një grup pune për ndërtimet pa leje. Çdo të thotë ky grup pune? Çfarë ka si objekt? Cili është produkti që do të prisni dhe çfarë do të bëni me atë produkt?

Produkti i dëshiruar i evidentimit të ndërtimeve të prishura të kundraligjshme, që deri më sot numëron 12 mijë të tilla, është për të evidentuar pasurinë e ligjshme të shqiptarëve, që është shkatërruar në kundërshtim me ligjin, bëhet për ti ndihmuar për të bërë gati kompensim financiar në përputhje të plotë me detyrimet që lindin ashtu kur qeveria shkakton një dëm. Pra të kemi një data baze të plotë, sot për të asistuar me ndihmë juridike, nesër për të gjetur mundësinë për t’i kompensuar për dëmin e paligjshëm financiar.

A mund të zgjidhet në mënyrë politike kjo? A duhet ta zgjidhë gjykata?

Sigurisht që gjykata dhe vetëm gjykata. Ju thashë asistencë juridike e kam fjalën për në gjykatë. Nuk do bëjmë vetë Ali, vetë Kadi. Por këta njerëz kanë nevojë për ndihmë, s’kanë ku të ulin kokën s’kanë bukë, jo të kenë para për avokat. Që sot kjo bazë të dhënash po përdoret pra sa herë kanë ardhur tek PD i është dhënë ndihmë gjyqësore falas, Kjo ka ndodhur edhe me të larguarit nga puna, PD ka bërë në kuptimin e plotë të fjalës avokatin, juristët tanë. Një pjesë e parave të konfiskuar nga pasuria korruptive e zyrtarëve do përdoret për ata që janë dëmtuar me të padrejtë nga kjo qeveri.

Përshembull? Ne do kemi lekët e chek­up mbrapsh si ndodh?

Ato do shikohen rast pas rasti, ndërsa për lekët i chek­up ju i keni paguar në kuptimin e taksimit të përgjithshëm, nga kanë ardhur këto para…

Nëse dalin nga ky buxhet i kemi paguar në njëfarë mënyre…

Sigurisht, çdo shqiptar i ka paguar, por në kuadër të prioriteteve do shikohen prioritetet, sepse roli i një qeverisje dhe roli i qeverisë sime, kur shqiptarët të më besojnë me votë do të jetë padyshim hapja e perspektivës për zhvillim, dhënia e drejtësisë për padrejtësitë e bëra në 2 vite. Këto miliarda euro do ti kthehen, duhet, mund ti kthehen ekonomisë shqiptare.

Çështja e doganave, ju i keni kërkuar prokurorisë të hetojë? A keni informacion nëse Prokuroria ka filluar të hetojë?

Nuk kam informacion…

A është normale që prokuroria të ketë një informacion kaq hermetik në lidhje me kërkesa kaq të rëndësishme që i bën një nga vektorët më të rëndësishëm të demokracisë në vend siç është opozita?

Nuk është normale për një vend normal. Por prapë kthehemi tek debati a është vend normal ai ku traun e doganës e ul dhe e ngre kryeministri dhe kjo dihet botërisht? A është vend normal ku ata që denoncojnë kontrabandën, punonjës të antikontrabandës pushohen nga puna? Pasi pushohen ata iu pushon edhe familjarët nga puna. Në vend që të promovohen, në vend që të ruhen me masa speciale dhe dëshmitë e tyre të shërbejnë për të dënuar kontrabandistët, ata përjashtohen. Pse? Sepse prapa kontrabandës qëndron vetë kokoshi 200 milionësh, vetë Edi Rama. Prandaj në një vend normal nuk është normale që të ketë heshtje nga prokuroria, por jonormaliteti, normaliteti i Shqipërisë zë fill me pasjen në krye të vendit të një kryeministri jonormal, të korruptuar. Pa zgjidhur këtë çështje, pa zgjidhur këtë problem të madh të Shqipërisë, mendoj se është e kotë, jo e padrejtë që përpiqemi të hedhim përgjegjësinë sa majtas, djathtas. Ku ka prokuror që t’i futet, të hetojë e të çojë deri në fund një çështje që duhet botërisht që gëzon mbështetjen e kryeministrit apo kryetarit të Kuvendit. Kjo është arsyeja që kërkuam hetim ndërkombëtar edhe për vjedhjen e shekullit, për CEZ. Cila është ajo prokurori që mund të hetojë një dosje korrupsioni që bën bashkë Edi Ramën dhe Ilir Metën dhe ku janë falur 600 milionë euro, nga të cilat 100 milionë kesh.

Do flasim më votë për çështjen CEZ…pyetja ime e radhës është: Ju anatemoni Ramën për keqvajtjen e punëve, por nga ana tjetër e anatemoni po ashtu kur ai shkon e bën atë reprezaljen në thonjëza, apo vë gishtin tek fajtorët…

Po kjo është edhe për të qeshur edhe për të qarë, por le ta marrim pak më shtruar. Ta them unë pse e anatemoj. A kemi 6 muaj që në çdo të katërtën mbledhje të grupit parlamentar unë lexoj shifrat e doganave dhe i them kaq të mungojnë, i them që vidhen, ju them shqiptarëve që po vidhen, ju them se ne, opozita e vendit kemi të dhëna si vidhen, kemi të dhëna që edhe Edi Rama e di si vidhen. Edi Ramës i shkojnë raportet e Croën Agents se si po vidhet dogana, e doganave greke. Në vend që të veprohet, këto raporte flenë në sirtar. Kanë 6 muaj që flenë në sirtar. Pse? Kur sheh që s’mban më ujë pilafi shkon e bën një show po mirë që i shkarkoi nisi gjë procedim ndaj tyre, Pse i shkarkoi? Sepse ai është kryedoganieri. Po të mos ishte alarmi ynë, ku i bëri disa oficerë të marrin arratinë. Ka pretendime shokuese, se kërcënohen me jetë oficerë të policisë së shtetit apo policisë gjyqësore se ndjekin afera korruptive dhe lidhje kriminale të Edi Ramës dhe bandës së tij. Kjo është situata.

Po kjo është situata ashtu siç e pikturoni ju….

Nuk bëhet fjalë për anatomi, por për fakte, 326 milionë dollar për një vit me radhë u vidhkan pa pasur komplicitetin e krerëve më të mëdhenj të shtetit, pa miratimin kryeministrit që luan rolin e kryedoganierit dhe dy nëndrejtorëve të tij, Saimir Tahiri dhe Arben Ahmetaj. Biznesi e ka të qartë.

Çfarë do bëni ju me Saimir Tahirin dhe gjithë emrat që përmendët?

Me Saimir Tahirin kemi pasur dhe kemi qëndrim të prerë. Një njeri që është treguar me gisht nga punonjësit e policisë, nga mediat ndërkombëtare, i cili për të mbrojtur veten e tij, nga akuza se është përfshirë në trafik droge, ka pranuar një vepër penale të parashikuar nga neni 352 i Kodit Penal…Nuk dua ta personalizoj tek Saimir Tahiri por meqë e përmendët ju… Ministria e Brendshme është e rëndësishme, por atë e mban Edi Rama aty. Pse e mban një njeri të përfolur sikur ka lidhje të drejtpërdrejt me Shullazin e banda të tjera? Pse e mban aty një njeri të vërtetuar si bashkëpunëtor i bandës së Habiljave? Pse e mban aty një njeri që me gojën e tij në studion e një kolegut tuaj ka pranuar diçka të paligjshme siç është shitja pa kupon, pa faturë i makinës së tij.

Ai ka dhënë disa shpjegime për këtë…

Jo mo jo, çfarë shpjegimesh ka dhënë..kodi e dënon për mosekzekutim të vendimit të gjykatës. Ky është i njejti njeri, policit e të cilit fusin berberët në burg. Kjo është nje republikë e shembur e ka shembur korrupsioni.

Zoti Basha në këtë vend nuk ka asgjë 100% të vërtetuar…

Duket sikur është një diskutim i vezës apo i pulës, por nuk është i tillë. Pula dhe veza këtu është Edi Rama, edhe veza edhe pula. Në kuptimin figurativ se kështu është kokosh pa vezë, pjell vezë të arta vetëm për veten e tij dhe një grushti njerëzish që marrin përfitime, për askënd tjetër. Në dijeninë time nuk ka asnjë vend të botës ku drejtësia, prokuroria të funksionojë normalisht duke pasur mbi krye një kryeministër e një bandë që i bën presion çdo ditë. Ka rrugëzgjidhje, është politike, fillon me largimin e shkaktarit të kësaj gjendje. Piketat janë të qarta për çdo qytetar edhe për socialistët që kanë shpresuar për një vend pune dhe nuk e kanë.

Por nuk mund të punësohen sepse janë militantë të një partie, kjo duhet të marrë fund në Shqipëri…

Po të paktën të punësohen në bazë të meritës. As kjo nuk po ndodh, Janë larguar mijëra persona nga puna në vend të tyre janë sjellë kriminelë.

Shpresojmë të mos premtoni tani që do punësoni demokratet kur të vini në pushtet…

Më vjen shumë keq që po ktheni fjalët e mia mbrapsh. Unë po them që ka socialistë që kanë shpresuar që do kishin një vend pune pas 8 vitesh, e çfarë shohim njerëz të dënuar për krime që marrin vende pune.

Keni shfaqur kritika edhe për pr/buxhetin e vitit 2016, pra keni këndvështrime të ndryshme me qeverinë… A mund të jetë kështu bardh e zi gjithçka?

Unë mendoj se kjo qeveri është diskretituar tashmë si mashtruese, i kryesuar nga një kryeministër mashtrues, jo vetëm për mashtrim politik, ky gënjen thjesht për të gënjyer, por pasi gënjen nuk kërkon falje se i mungon sensi i pendesës. Kjo tregon se është i pandjeshëm në kufijtë e patologjikes. Tha se ka qenë në meshën e parë në Shkodër. Mirë që gënjeu por të thotë më falni o njerëz se doja të thoja diçka tjetër..Po kur thotë që ka qenë basketbollist me kombëtaren, çfarë prisni të thotë për buxhetin? Të gënjejë dhe të mos kërkojë falje, do ulet borxhi, viti i parë me suficit, këtë ka thënë edhe një vit më parë. Por borxhi u rrit. Thotë 720 milionë dollarë borxhi i fshehur, po ku janë mo? Na i trego ke dy vite në qeverisje. Nuk ka borxh të fshehur. Ky me nxitjen e BB mori një kompani që auditoi borxhin dhe i tha se borxhi në total është 240 milionë dollarë.

Pra që nuk ishin paguar, këtë mund ta pranoni…

Po s’mund të paguhen, Po shteti nuk është një individ që nxjerr kuletën, shteti kur planifikon një investim për 3 vite, thotë që edhe pagesa planifikohet për 3 vite. Shteti funksionin me buxhet. Gabimi i parë është që kjo u llogarit si borxh, nuk mund të llogaritet borxh. Është njëlloj sikur të thuash që sot i kemi borxh Vilma Nushit 80 milionë euro. Jo nuk ia kemi, se pagesa është vit pas viti.

Kjo është denoncuar edhe nga biznesi që ka pasur vonesa në atë kohë në pagesat e punëve publike…

Të mos i futemi kësaj ky ka thënë 720 milionë ku janë? Shqiptarët duhet ta dinë që bën auditimin e borxhit i doli ndryshe nga sa kishte thënë dhe nuk u pagua. Këtë e pranoi edhe zoti Blushi, kemi i vit e gjysmë që i themi ke marrë 1,4 milionë dollarë, çfarë ke bërë me to? Mos është shtuar ndonjë tunel që nuk e kemi parë? Kemi kullën në Korçë, është tjetër gjë atje është problemi, asnjë investim për të përmirësuar jetën e njerëzve. Investimet janë darovitur tek carapulët, tek papulët, tek ndërtuesit e vilave, të sarajeve të tij.

Të rikthehemi tek projektbuxheti, ju keni propozimet tuaja, do paraqisni propozime konkrete në lidhje me këtë projektbuxhet?

Ne kemi paraqitur dhe nesër në orën 12 nëse nuk gabohem kemi thirrur një takim me biznesin për të diskutuar paketën tonë të shpëtimit, paketën ekonomike për të nxjerrë vendin nga kriza ekonomike.

A mund të na thoni diçka në anteprim të kësaj?

T’i japësh kësaj qeverie luksin e një debati kur është provuar që dështoi në dy vite radhazi dhe prapë ka sjellë pr.buxhetin e dështimit mendoj nuk do ishte as e zgjuar, as e mirëpritur nga çdo lloj opozite. Ndaj ne tanimë dialogun e kemi me biznesin me sipërmarrjen, fermerët, taksapaguesit. Ne kemi një koncept të plotë të nxjerrjes së vendit nga kriza ekonomike. Ky ka kapur çfarë i ka zënë syri por konceptin nuk e ka, sepse shkaktari i këtij zullumi nuk mund të jetë edhe ilaçi.

A mund të më thoni një propozim konkret që do i bëni nesër, një alternativë?

Jo nuk mund të jap një propozim, të jap të plotën. Unë nuk besoj në formulat e fshehta, në dhomat e errëta. Propozimi ynë, i cili do të shpaloset nesër publikisht bazohet në një prekje reale të gjendjes dhe zgjidhje reale, jo kuturu. Nga kjo gjendje është e vështirë të dilet, por qeveria ime do ta nxjerrë vendin nga kriza ekonomike, me një vizion të konsoliduar të politikave fiskale, me një set të qartë prioritetesh ekonomike do të riinjektojmë besim, frymëzim tek investimet e brendshme, tek kreditimi, tek investimet e huaja dhe do të nxisim punësimin dhe ringjalljen e ekonomisë. Vizioni është i plotë.

Ku do t’i gjeni paratë, borxhin e keni 70%…

Me tre fjalë. Flasim me fjalë të vogla, siç thotë Flori Mumajesi. Së pari duke ulur taksat, duke e bërë Shqipërinë vendin më konkurrues, me taksat me të ulëta në Ballkan, në të njëjtën kohë kjo do t’i shërbejë siç u shërbeu ulja e parë e taksave në vitin 2007, statistikat janë historike, flasin qartë, një mbledhje më të madhe të ardhurash. Sa më shumë i rrit taksat aq më pak i mbledh. Pse? Një pjesë falimentojnë, një pjesë i zhyt në informalitet. Ne do t’i ulim taksat, ne do ta bëjmë Shqipërinë vendin me taksën e sheshtë më të ulët në Ballkan dhe kjo do të sjellë një rritje të të ardhurave. Kjo gropë që ky shkaktoi që është pjesërisht vjedhje e drejtpërdrejt dhe pjesërisht nga falimentimi i kompanive, mund të mbushet vetëm duke e braktisur drejtimin që po ecën Edi Rama. Braktisja nuk bëhet duke gënjyer bizneset që të hoqa unë taksën deri në 50 mln kur i këput me një gjobë i merr 5 mln. Me një koncept të konsoliduar është koncepti ynë fiskal. E kam prezantuar, e kam diskutuar me biznesin, e keni transmetuar ju në kronikat tuaja, nesër do të prezantohet i plotë.

Me fjalë të vogla, do të ulni taksat për të gjithë?

Ulja e taksave do të jetë një nga kontribuuesit për rritjen e të ardhurave.

Investimet me çfarë do t’i përballoni?

Investimet do të përballohen duke i rënë me sëpatë korrupsionit, asaj që e quan luksokraci Blushi, por që në fakt është hajdutokraci. Pra, palmat që blihen sa 5 herë çmimi, dritat që blihen, të autostradës sa 4 herë çmimi. Kulla që ndërtohet sa 2 herë preventivi. Jaguarët që blihen kur të gjithë kanë nja 1­2 makina ministrat.

Por nuk u blenë…

Atë do ta shohim, më mirë mos t’i marrin se do na detyrojnë të marrim akte ekstreme pastaj. Është një bllok shpenzimesh korruptive dhe luksoze të qeverisë që do të priten të parat nga zëri i shpenzimeve.

Si e garantoni sistemin tuaj?

Shpenzimet operative të qeverisë shqiptare nën drejtimin tim do të jenë shpenzimet operative më të ulëta në Ballkan siç i takon një vendi që nuk mund të paguajë për luksin e qeverisë. Së dyti, të gjitha paratë e taksapaguesve shqiptarë që do të kursehen përmes prerjes së luksit do të destinohen vetëm për investime publike, që çon rritje ekonomike.

Me borxhin 70% çfarë do bëni?

Ky është një problem i jashtëzakonshëm që Edi Rama i ka shkaktuar vendit. Fakti që ka marrë 1 miliard e 100 milionë euro dhe i ka vjedhur dhe i ka shpërdoruar është një problem shumë i madh.

Keni zgjidhje për këtë?

Pa dyshim që kemi zgjidhje për këtë. Është një barrë e madhe sepse me këto para, sektorë si bujqësia mund të përparonin në 10 vite me kushte të paimagjinueshme për fermerin, me 100 mln dollarë në vit për 10 vite fshati shqiptar transformohet rrënjësisht. Megjithatë ne kemi zgjidhje për të mbajtur nën kontroll borxhin publik por jo duke i marrë oksigjenin ekonomisë kombëtare. Ne do të kemi një portofol robust për investime në infrastrukturë dhe do të kemi qeverisjen më të vogël, më të përballueshme, më të pakushtueshme për taksapaguesit shqiptarë.

Do ndalemi tek çështja e pronave. Në parlament po diskutohet projektligji për Pronat, opozita është kundër, ashtu siç duket se janë dhe pronarët. Çfarë ka gabim ky ligj?

Ky ligj pretendon të zgjidh çështjen e pronarëve, duke i kompensuar ata me vlerën kur pronat u shpronësuan. Në themel të këtij ligji qëndron, ashtu si qëndron dhe në themel të paturpësisë dhe pacipësisë, një arrogancë se këta janë në ‘mall të babës’. Që kjo është Shqipëria e atyre, dhe gjithçka u takon atyre. Këtë e them me gojën plotë. Dhe unë kam pasur dyshimet e mija madje dhe të kërkoja dhe falje para qytetarëve, se sensi i adhurimit për paraardhësit e tyre politik do ishte e thellë tek Edi Rama. Siç ishte dhe dekorimi i xhelatit të At Zef Pëllumbit, që ky e ka njohur personalisht. Një plejadë xhelatësh që dhe diktatura nuk i dekoroi, i la ashtu. Ky i dekoroi dhe i mbajti të fshehtë. Deri sa skandali plasi nga “Gazeta Shqiptare”. Pas kësaj qëndron një proces mendor psikologjik i nevojës për të legjitimuar regjimin e kaluar, pasi në masë të madhe këta e shohin si nomoklatura komuniste. Dhe mendojnë se me akte të tilla mund të shpëlajnë turpin me të se cilën shoqëria shqiptare e arkivoi regjimin e Enver Hoxhës. Këta e konceptojnë veten e tyre si pronar, të Shqipërisë dhe shqiptarëve. Pas kësaj qëndron një mendësi e vjetër. Për anën ligjore nuk kam asnjë pikë shqetësimi, pasi është një akrobaci e dështuar që në nisje. Ai u ka thënë pronarëve se nuk jemi ne partia juaj. Dua ti them pronarëve se ky ligj nuk ka shans ti qëndrojë testit kushtetues. Gjykata e Strasburgut për çështjen ‘Sharra’ ka vendosur në mënyrë të qartë që mos t’i kompensojë ata me çmimin e tregut. Ne do bëjmë argumentimin tonë ligjor në sallën e Parlamentit.

Do e çoni në Strasburg?

Jo, do e çojmë së pari në Gjykatën Kushtetuese, e cila ka marrë një numër vendimesh qartësisht nën presion politik, ndaj uroj të ketë dinjitet dhe ta hedh këtë pseudo­ligj. Përndryshe çështja do shkojë në Strasburg. Ne së bashku me pronarët do ulemi për t’i dhënë një zgjidhje realiste çështjes së pronave. Ne duhet të kishim bërë më shumë. Brenda kësaj gjenerate duhet t’i japim një zgjidhje, por nuk është një problem i lehtë.

A ka nevojë për një rikonceptim nga e para të ligjit të Pronave? Zoti Berisha e ka pranuar këtu në këtë studio 2 vite më parë, duke marrë përgjegjësinë për ligjin e pronave si një përgjegjësi personale, që u përdor dhe nga mediat. A ka nevojë për një ndryshim radikal ligji i Pronave?

Ka nevojë për një zgjidhje realiste për këtë problem, duke zbatuar standardet më të mira ekzistuese të kthimit të pronave, pasi pronarët janë përballur me poshtërim dhe persekutim, që t’i japë një zgjidhje reale këtij problemi. Unë dhe ekipi im po punojmë për të zgjidhur këtë problem. Çdo hap që do merret për këtë drejtim, do hidhet pas një konsultimi shterues. Një mendimtar.. një mendje e ndritur e kombit në një nga librat e tij ka thënë se ‘ligji për çështjen e pronave është po aq i rëndësishëm sa çështja e hapjes së dosjeve, pasi shpëlan në një farë mënyre identitetin dhe vetëdijen kombëtare’. Ne po bëjmë Dekriminalizimin, pa bërë akoma Dekomunistizimin.. Dekomunistizimi është një frazë me të cilën është abuzuar kohët e fundit.

Ju ligjin e dosjeve nuk e votuat..

Nuk kishim si ta votonin.

Pse jo?

Nuk mund ta votonim se është një ligj që është hartuar me mendësinë e persekutorëve dhe jo e të persekutuarve. Ky është një ligj që është bërë për të varrosur të vërtetën. Është pjesë e kompleksit të Edi Ramës, bën gjëmën dhe nuk kërkon falje. Kjo nuk mund të mbetët në ndërgjegjen e kombit. Ne nuk mund të pranojmë një ligj gjysmakë dhe s’mund të pranojmë që ai të shitet si i plotë nga një klasë qeveritare që dekoron persekutorët.

Kthehemi tek Dekriminalizimi..se çështja e dekomunistizimit do ngelet sërish në fokusin tuaj kur të vini në pushtet..kuptoj se projekti juaj i ilustracionit do të rikthehet..nëse ktheheni në pushtet.

Vendi ka prioritetet e veta dhe zbardhja e atyre krimeve do ketë vëmendjen time. Kam ngritur dhe një departament për të Përndjekurit dhe Pronarët.

Çfarë do bëni për këtë çështje kur të vini në pushtet?

Do vazhdojë të bëjë ato që kam premtuar, siç janë dëmshpërblimi. Për t’i dhënë shqiptarëve në trajtimin historik, një përqasje më të denjë për t’u përballur më të kaluarën e tyre.

A e vlerësoni nisëm tuaj për Dekriminalizmin, si nisëm e vetme që ka fituar opozita, pavarësisht pikës për ‘Testin e drogës’.

Nuk është nisma e vetme, pasi sot shqiptarët pa dallim bindjesh politike, e them dhe pa sens rivendikimi, pranojnë ku me zë të ulët e ku me të lartë, se qëndrimet tona sa i takon politikës së gabuar, kanë qenë të drejta. Nëse do na e kishin vënë veshin për të ndalur rritjen e krimit në sistem, për të ndalur rritjen e taksave, vendi nuk do ishte në këtë gjendje. Por do thoja se në këto 25 vite, asnjë opozitë nuk ka arritur sukses më të madh se PD­ja, me çështjen e Dekriminalizmin. Unë kam dyshime të mëdha se Edi Rama ka vullnet politik për ta zbatuar këtë ligj, ndonëse me draftin e dorëzuar nga ne është bërë e vështirë që të mos zbatohet. Por kur Gjykata lë në burg viktimat dhe lëshon agresorët, siç ishte dhe rasti i Armando Prengës, apo vrasësi i komisarit. Pra ne do konsistojmë tek zbatimi i ligjit, ndërsa Rama vazhdon flirtimin e tij të pareshtur me kriminelët. Ky është një problem i madhe për vendit, për pasuritë e shqiptarëve, për aftësinë e policisë për të bërë punën e saj.