Në një atmosferë me aktivitete të shumta sportive në Fier u çel sot sezonin e ri turistik.
Kryetari i Bashkisë së Fierit, Armando Subashi u shpreh se “këtë vit përgatitjet filluan herët, për ta kthyer në kushte optimale jo vetëm bregdetin e Darzezës, por edhe bregdetin e Semanit, Hasturkasit e Ndërnënasit në Libofshë”.
Ai siguroi se Bashkia do të vazhdojë më tej me të gjithë elementët e nevojshëm, për të siguruar kushte më të mira dhe për të rritur numrin e pushuesve dhe vizitorëve.
Darzeza, Semani, Ndërnënasi, Pish Poro janë vetëm disa nga plazhet e vijës bregdetare të Fierit, bregdete që në pjesën më të madhe të tyre janë ende të panjohura, edhe pse shumë të bukura dhe me pak shpenzime.
Plazhe ranore me shtrirje të konsiderueshme që të ofrojnë qetësi dhe argëtim në të njëjtën kohë.
18 km në perëndim të qytetit të Fierit, shtrihet plazhi i Semanit, me gjatësi 7 km. Pjesë vijës bregdetare të Fierit janë po ashtu edhe plazhi i Darzezës 13,7 km, plazhi Ndërnënas 8 km, dhe plazhi Pish Poro 9,5 km.
Hapësira pa fund bregdetare me rërë të imët kurative, plazhe familjare me ujëra të ngrohta dhe të cekëta të pasura me gjallesa ujore janë ato që të ofron kjo pjesë e Adriatikut.
Ndërkohë gatimet tradicionale me prodhime vendase dhe çmime të përballueshme mbeten joshja e pushuesve në bregdetin e Fierit.
Vija bregdetare e Fierit nuk ofron vetëm plazhe, por edhe vende fantastike për aventurë, për qitje me piatel në pyll, eksplorim, peshkim apo sporte ekstreme.
/a.r
