Drejtori i Përgjithshëm i Zyrës së Regjistrimit të Pasurive të Paluajtshme, Valdrin Pjetri, bëri të ditur se shërbimi “Fast Track” mbulon 50% të rasteve në Zyrën Vendore të Regjistrimit të Pasurive të Paluajtshme.
Kryeregjistruesi Pjetri gjatë një interviste në studion e Agjencisë Telegrafike Shqiptare tha se ky shërbim brenda muajit mars do të përhapet në të 35 zyrat e regjistrimit të pasurive në vend, ndërsa shtoi se tashmë zyra e Regjistrimit të Pasurive është e angazhuar të përfundojë edhe procesin e legalizimit për 16 mijë procedura të mbetura stok përgjatë viteve 2012-2017, ndërsa 15 000 të tjera janë trajtuar tashmë.
Gjatë intervistës, Pjetri sqaroi dhe rëndësinë e dixhitalizimit të arkivës shtetërore.
““Fast track” është projekt i vitit 2018 i Zyrës Qendrore të Regjistrimit të Pasurive të Paluajtshme. Fillimisht Zyra bëri një studim të ofrimeve të shërbimeve në vitin 2017. Zyrat tona ofrojnë mbi 1 milion shërbime në vit, ku në 50% të rasteve janë 9 shërbime bazë që përsëriten më shpejt. Më konkretisht, shërbimet që tashmë janë pjesë e platformës “Fast Track”, janë shërbimet kontratë shitje, kontratë dhurimi, hartë, bllokim apo zhbllokim pasurie në bankë. Këto janë shërbimet bazë që përsëriten në 50% të rasteve, nga 1 milion shërbimeve në vit, 500 mijë janë pjesë e platformës “Fast Track”, tha Pjetri.
“Këto shërbime kishin kohën e shërbimit nga 4 deri në 8 ditë pune, por në shumicën e rasteve ishin jashtë afatit. Po ashtu kjo na sillte ekspozim ndaj abuzimeve apo korruptim të punonjësve. “Fast Track”, apo shërbimi shpejtë, i ofron këto 9 shërbime për 24 orë te qytetari”, tha Pjetri.
“Më 1 nëntor ne nisëm ta pilotojmë në Tiranë. Tashmë çelëm një shërbim të ngjashëm edhe në Korçë, ku ishte dhe ministrja e Drejtësisë. Në analizën e punës së kryer nga ne, rezultoi me shumë sukses. Shërbimi ofrohet për 24 orë te qytetari dhe zyra jonë qendrore planifikojë këtë në 35 zyrat tona në Republikën e Shqipërisë. Janë bërë trajnimet, sipas urdhrit të kryeregjistruesit, zyrat do të kenë logo të dedikuara, zyrë të dedikuar dhe këto shërbime do të ofrohen për 24 orë te qytetari”, tha Pjetri.
Ai bëri të ditur se falë hapjes së shërbimit “Fast Track” është rritur dhe efikasiteti i punës te zyrat hipotekore. “Duke qenë se në zyrën e Tiranës, meqenëse ishte projekti pilot, ne hapëm një zonë të re që merret vetëm me shërbimet “Fast Track”, ku u përzgjodhëm 22 punonjës, më të mirët e zyrës së Tiranës, u spostua 50% e fluksit te zona e shërbimit të shpejtë, në zonat e tjera ra fluksi punës dhe ky fluks i munguar, është zëvendësuar me regjistrimin e legalizimeve të mbetura stok, që është një tjetër nismë”, tha Pjetri.
Sipas tij, brenda korrikut pritet të përfundojë trajtimi i pronave në legalizim prej vitit 2012 deri në vitin 2017.
“Në tetor të vitit 2018 ne bëmë një inventar fizik të lejeve të legalizimit të lëshuara nga drejtoritë rajonale të Aluiznit të ardhura pranë zyrave tona, por të patrajtuara kurrë. Ky stok, datonte nga viti 2012-2017. Rezultoi të ishin rreth 31 mijë leje legalizimi të akumuluara ndër vite dhe rrinin stok në zyrat tona për shkak të një ngërçi ligjor, që u zgjidh në tetor të vitit të shkuar”, tha Pjetri.
“U bë një plan pune, sepse Ministria e Drejtësisë kërkonte evadimin e tyre dhe u bë një plan pune në nëntor të vitit të shkuar, me qëllim që në korrik të 2019 të përfundojë 100% procesi i regjistrimit të lejeve të legalizimit. Po flasim për stokun, deri tani janë realizuar rreth 15 mijë leje legalizimi, janë rreth 16 mijë të tjera deri në 2019”, theksoi Pjetri.
“Deri tani, pasi çdo zyrë ka bërë planin e saj të punës, në analizën që bëmë në fillim të marsit janë respektuar afatet e regjistrimit të tyre deri në korrik 2019 do të përfundojë stoku me 31 mijë leje legalizimi. Njoftoj të gjithë shqiptarët, që ndoshta dhe kanë humbur shpresë, se në zyrat tona vendore, rrjetet sociale, por dhe në media është shpërndarë lista e qytetarëve që u është regjistruar leja e legalizimit. Çdo fundjavë apo çdo fund dy javësh, përditësohet lista. Në mënyrë që qytetarët të marrin njoftim, bëjnë aplikimin e thjeshtë”, tha Pjetri.
Kryeregjistruesi Pjetri u shpreh se ZRPP ka dy marrëveshje të rëndësishme, me Postën nga njëra anë, dhe me Noterin në anën tjetër. “Sa do të mirë mund të bëjmë punën, pa Postën, pa kanalizuar produktin tonë te qytetari përmes Postës puna jonë është e paplotë. Ne kemi marrë shërbimin ekspres nga Posta Shqiptare, një shërbim i shpejtë e korrekt”, tha ai.
“Jemi të kënaqur dhe ky shërbim do të thotë dorëzimi i postës te qytetari brenda ditës. Në orën 15:30 vjen punonjësi i Postës në zyrat tona, merr dokumentet e trajtuara dhe niset për të bërë shpërndarjen. Ka raste që kjo bëhet dhe brenda ditës, pra brenda orarit të punës, orës 17:00”, tha Pjetri.
Lidhur me marrëveshjen me Dhomën e Noterisë, Pjetri shtoi se, “kjo është një marrëveshje e nënshkruar në vitin 2016. Noteri përmes kësaj marrëveshje kontrollon statusin juridik të pasurisë online, çka rrit efikasitetin dhe kursen kohën e noterit dhe qytetarit për të mbërritur te dokumente që i nevojiten në punën e përditshme”.
Po ashtu kryeregjistruesi Pjetri bëri të ditur dhe rëndësinë e digjitalizimi të arkivës. “Sot që flasim një punonjës i joni gjatë trajtimit të një praktike i duhet të lërë postin e punës, të shkojë në arkiv, të kërkojë dokumentacionin përkatës. Pra kërkon një kohë fizike të madhe. Ne kemi menduar dhe projektuar të digjitalizojmë arkivin”, tha Pjetri.
“Kemi rreth 47 milionë dokumente, që datojnë nga krijimi i shtetit shqiptar deri në aplikimin e fundit. Të gjitha këto dokumente do të digjitalizohen, indeksohen, në mënyrë që punonjësi jonë përpara ekranit të kompjuterit të ketë të gjitha informacionet që i nevojiten. Pra përfiton kohë, ruan dokumentet nga degradimi, pasi nga përdorimi i tepërt edhe prishen”, tha Pjetri.
“Dokumentet janë kopje unike dhe duhen ruajtur me fanatizëm. Një pjesë tjetër është dhe fenomeni i humbjes apo i zhdukjes, që nxit korrupsionin. Në momentin e parë që ndodh kjo, edhe sikur të humbë fizikisht, ajo është e skanuar dhe merr një kopje dhe vijon puna normalisht”, tha Pjetri.
“Një tjetër e mirë që sjell digjitalizimi arkivave është dhe korrespondenca me shumë institucione, ILDKP, Aluzinin, bashkitë, Vetingun… etj. Këtu harxhojmë kohë fizike dhe kosto të tjera, por jo vetëm. Në momentin e parë që kemi arkiv digjital, institucioneve i jepet akses online për të parë statusin juridik të pasurisë apo informacione të tjera me interes për këto institucione”, tha Pjetri.
Në fund ai foli dhe për pranimin e studentëve të ekselencës. “Rasti i parë që kemi është i para pak ditëve te Zyra Vendore e Regjistrimit të Pasurive në Durrës ku u rekrutuan katër studentë, njëri prej tyre me medalje ari. Kjo është një mundësi që iu dha drejtpërdrejt këtyre studentëve. Ata kanë nisur punën tashmë, kanë kontratë prove sipas Kodit të Punës, fillimisht tremujore. Deri tani kanë pasur performancë shumë të mirë dhe kjo është një mundësi e mirë që studentëve të ekselencës t’i japim mundësinë për të njohur nga afër dhe procesin e punës”, tha Pjetri.
