Për shkak të sasisë së madhe të bishtave të cigareve, autoritetet tajlandeze morën vendimin për ndalimin e konsumimit të cigareve në të gjitha plazhet e vendit.
Ky vend juglindor aziatik tashmë prej dekadash është një vend që frekuentohet nga turistët, ndërsa këtë vit mund ta vizitojnë rreth 37,5 milionë turistë, një shifër rekord.
Megjithatë, Tajlanda prej kohësh përballet edhe me probleme ekologjike, çka ka shqetësuar organizatat për mbrojtjen e mjedisit.
Organizatat kanë bërë thirrje që të ndërmerren masa për të ruajtur pastërtinë e 357 plazheve në Tajlandë, që shpeshherë renditen në listat e destinacioneve më të bukura në botë.
Vendimi për ndalesën e pirjes së duhanit ka hyrë në fuqi para disa ditëve, ndërsa të gjithë ata që dëshirojnë të konsumojnë cigare mund ta bëjnë këtë në zonat ku ajo është e lejuar.
Në të kundërtën, duhanpirësit mund të përballen me gjoba deri në 3 190 dollarë ose dënim me një vit burg.
a.ç
