Deputeti nga LDK-ja, Bardhyl Meta përmes një postimi në Facebook ka rrëfyer se si bashkëshortja e tij Adelina i ka qëndruar pranë në momentet kur ai i ishte nënshtruar një operacioni.
Meta e ka quajtuar si heroinë Adelinën, për të cilën thotë se asnjë sekondë nuk e ka lënë vetëm.
Ky është postimi i plotë:
Një bashkëbisedim i KTV-së (Amir Mjeku) me Adelina Thaqin – bashkëshorten dhe Heroinën time – e cila për asnjë sekondë në gjashtë muajt e fundit të kalvarit tim me kancerin – s’më ka lanë asnjë sekondë vet – sikur edhe në ato 6-7 ditët e netët e rënda pas operacionit të dytë 12 orësh, kur unë isha në koma 7 ditshe, një kohë kur Adelina nga 18 orë, më ka fol tek veshi: për vajzat tona, për ne të dy e lidhjen tone, më ka këndue të gjitha kangët që i dua, mi ka lexua qindra letra që vinin në ditë prej miqve, dashamirëve e familjareve tane…
– Një rrëfim që mi ktheu lotët dhe përjetimet e Heidelbergut të Gjermanisë (qytetit tim të Ri-lindjes!)…, dhe më ktheu edhe krenarinë – për faktin se çfarë burrneshe ma dhuroi Zoti si bashkëshorte, kur më përballi e lidhi me Adelinën…/a.ç
