Kompania prestigjioze kineze “Power China” do të bashkëpunojë me palën shqiptare në rimëkëmbjen e sektorit hidrik në Shqipëri. Një muaj pas nënshkrimit të Memorandumit të Bashkëpunimit me Kinën, në fushën e menaxhimit të integruar dhe administrimit të ujrave, ministri i Bujqësisë, Edmond Panariti, u takua të martën me përfaqësues të kësaj kompanie, mjaft aktive në sektorin e ujit, me qëllim fillimin e punës konkrete në projekte afatshkurtra dhe afatmesme.
Përfaqësuesi i “Power China”, Zhang Kezhen, kërkoi nga pala shqiptare një plan strategjik të zhvillimit të sektorit të ujrave dhe administrimit të tyre, në mënyrë që të identifikohen nevojat më imediate për menaxhim, ndërsa u shpreh i gatshëm për të garantuar, si investime direkte, ashtu dhe financim të projekteve.
Ministri Panariti, identifikoi dy sektorët më të rëndësishëm ku mund të ndërhyjë kompania kineze, siç është sistemi ujor kombëtar, si dhe hartimi i projekteve të fizibilitetit për energjinë alternative, me panele diellore ose me anë të erës dhe për këtë të fundit, identifikoi Gadishullin e Karaburunit.
Palët konkluduan që gjatë muajit dhjetor të këtij viti, specialistët e kompanisë kineze dhe të ministrisë shqiptare të Bujqësisë, të fillojnë punën konkrete, me qëllim konkretizimin e disa projekteve fizibiliteti për sektorë që kërkojnë ndërhyrje të menjëhershme.
Ndërsa Ministri i Bujqësisë deklaroi se, në vazhdim të bashkëpunimit, mund të ndiqet dhe modeli PPP (Partneriteti Publik-Privat).
“Power China” është është aktive në sektorin e ujit, në infrastrukturën ujitëse, në projektet e transferimit të ujit, trajtimit të ujërave të zeza, si dhe në projektet e shfrytëzimit të ujit në Azi e Afrikë. /