Nga Bardhyl Minxhozi/
Çfarë po ndodh me skuadrën dhe qytetin e vogël Leicester, është padyshim një përrallë e bukur për çdo të rritur. E gjithe bota flet për ta. Eshtë kryelajm i të gjitha mediave.
Ekspertët kane kohë që flasin për një skuadër të vogël që po arrin një sukses të madh historik. Analizat teknike të lojës së tyre, skemat taktike të Ranierit, kanë tronditur klubet e mëdha dhe futbollistët e superpaguar, kanë tronditur futbollin si një industri multimiliardere.
Përveç se një kuriozitet sportiv dhe historik, popullariteti i Leicester, është gjithashtu një dëshirë e çdo njeriu apo skuadre për t’u ngjitur në krye, për të thyer barrierat që e rrethojnë, për të thyer skemat tradicionale dhe të “fortët” që diktojnë rregullat e lojës. Endrra-Leicester është ëndrra e çdo klubi të vogël, është ëndrra e çdo njeriu, është në një farë mënyre një lloj “revolte” ndaj sistemit ekzistues të funksionimit të futbollit. Prandaj janë të gjithë të çmendur pas Leicester!
Futbolli ka vite që është komercializuar në mënyrë ekstreme. Shitblerje lojtarësh me shifra astronomike, klube të mëdha që “konkurojnë” me ndermarrje të medha industriale, manjatët financiarë që prej vitesh e shikojnë futbollin si një investim financiar të leverdisshëm. Më tej, futbolli është një “lojë” e madhe e të drejtave televizive dhe kompanive të basteve.
I gjithë ky mekanizem i madh financiar ka rritur polarizimin e futbollit. Klubet e mëdha kanë mundësi të bëhen më të mëdha dhe të vegjelit më të vegjël. Parashikimet se kush do të jetë në krye në Gjermani, Francë, Spanjë ,Itali etj., kush do të jetë në gjysëm finalet e Champions Leage, jane lehtësisht të identifikueshme.
Natyrisht nuk mund të përjashtohet futbolli nga të qenit industri, nuk mund të mendohet futbolli pa investimin për të fituar, por nuk duhet harruar që futbolli është në fakt një lojë për të gjithë.
Suksesi “Leicester” është ndërkaq një rast për drejtuesit e futbollit europian, për të reflektuar për ngushtimin e diferencave midis të mëdhenjve dhe të vegjëlve. Meqenëse sot futbolli është shndërruar në industri, atëhere të paktën të aplikohen rregulla të ngjashme antimonopol, që zbatohen për të gjithë industritë e tjera.
Në këtë mënyrë konkurenca do jetë më e hapur dhe e ndershme dhe parashikimet do të jenë më të vështira. Futbolli do të mbetet një lojë e magjishme dhe e bukur. Dhe “Endrra Leicester ” mund të jetë realitet i të panjohurve të tjerë!
Posaçërisht për Javanews.al
