Me gushtin do të mbyllet edhe sezoni i pushimeve, ku shtatori do të sjellë një rikthim në ekranet televizive të disa formateve. Ndonëse thuajse të gjithë personazhet e njohura të ekranit janë me pushime, tashmë po mbyllen edhe detajet e fundit të formateve të reja televizive që pritet të nisin së shpejt.
Si gjithnjë, shumë interes ka edhe për ndryshimet që shpesh ndodhin në ekrane, që këtë sezon duhet të themi janë të shumtë. Disa prej emrave që më së shumti kemi hasur në televizione përgjatë sezonit të shkuar, duket se këtë herë do të mungojnë. Një prej mungesave të para është pikërisht Fjoralba Ponari.
Ky sezon e solli krejt ndryshe bionden simpatike, ku për herë të parë provoi që të moderonte e vetme një format të ri televiziv, si ishte “Ferma VIP”. Pas shumë vitesh, ajo u largua nga “Portokallia” për të ndryshuar edhe shtëpinë mediatike. Megjithatë, bëhet me dije se Fjoralba nuk do të jetë moderatorja e “Ferma VIP” sezonin e ardhshëm. Nuk dihet ende se çfarë e ka shtyrë prezantuesen drejt këtij vendimi, por ajo që dihet deri më tani është fakti se Fjoralba aktualisht është jashtë ekranit të madh. Mbetet për t’u parë nëse ndonjë televizion tjetër do të shfaqë interes për ta pasur si mikpritëse në të tjera formate.
Një tjetër emër që duket se shtatori do ta gjejë sërish jashtë ekranit është edhe Arbana Osmani. Të gjithë kemi qenë “sy e vesh” duke pritur rikthimin në ekran të Arbana Osmanit. E ftuar në “RTV Dukagjini” tha se nuk ka asgjë konkrete. “Nuk ka absolutisht asgjë konkrete. Në momentin e parë që do ketë një lajm konkret që dua ta ndaj me shikuesit, me kënaqësi do ta ndaj unë e para”.
Pyetjes nëse do e shohim në sezonin e ri televiziv, shtator-tetor, me ndonjë projekt të ri televiziv, ajo iu përgjigj me “Patjetër. Mund të jetë ‘Big Brother’, mund të mos jetë ‘Big Brother’. Kjo nuk ka shumë rëndësi. E rëndësishme është që unë do rikthehem në ekran, aty ku shikuesit më duan”. Kujtojmë se kjo periudhë për Arbanën ka qenë një fokusim te biznesi, familja dhe udhëtimet. Shumë kanë aluduar se prezantueses i është besuar formati “Big Brother VIP Kosova” sezonin e ardhshëm.
Shpeshherë, Arbanën e kemi parë duke udhëtuar drejt Prishtinës, ndërsa ajo ka treguar se ka të bëjë me zgjerimin e biznesit të saj edhe në trevat shqiptare dhe jo me karrierën e saj në televizion. E teksa prezantuesja e dy sezoneve të “BBV” kohë më parë është pyetur në lidhje me aludimet dhe zërat që po qarkullonin në median rozë se ajo do të prezantojë “BBVK” së bashku me këngëtarin shkodran Luiz Ejlli, Arbana zgjodhi të mos i mohojë këto lajme duke forcuar edhe më shumë dyshimet e ndjekësve. Por duket se nuk do të jetë kështu.
Edhe këtë sezon i ri, “Big Brother VIP” Kosova do të moderohet nga Jonida Vokshi dhe Alaudini. Nga ajo çfarë kemi mundur të mësojmë, Arbana pritet të rikthehet në ekranin e “Top Medias”, në janar, por jo në formatin e “Big Brother”.
Po jashtë ekranit do ta shoh veten edhe Roza Lati. Pas përfundimit të “Big Brother”, moderatorja përflitej se do të ishte pjesë e “Dancing with the Stars”. Por kur ky format u anulua për këtë sezon, Roza dëshironte të kishte një format të sajin. Por duket se një projekt i tillë nuk është miratuar, pikërisht edhe për ngjashmërinë që kishte me emisionin e pasdites, drejtuar nga Bieta Sulo.
Kujtojmë këtu që ndër të tjera, Bieta dhe Roza kohë më parë kishin edhe një sherr që vijoi gjatë mes tyre. Roza ishte e ftuar tek “Ftesë në 5” të Bietës për të folur për fotot e saj me të brendshme në vaskë që bënë shumë bujë. “Do të bëhesha bilionere nëse do të shisja kasetën time të seksit”, – ky është titulli që shoqëron foto e publikuara nga Roza.
Roza tregoi te Bieta se në të vërtetë nuk ekziston një video seksi në arkivën e saj dhe asnjëherë nuk do të guxonte që t’i arrinte disa gjëra në jetë nëpërmjet seksit. Por mesa duket intervista nuk ka shkuar mirë dhe Roza dhe këtë e tregoi Roza në “Instagram”.
“Unë nuk e kuptoj, të të ftojë tjetra në studio dhe të të ofendojë. Dhe ndërkohë më fshini videon? Nga walli? Kam 1001 ‘inbox’-e nga njerëzit që reagojnë si mundet në një emision televiziv të të fyejë tjetra në shtëpinë e vet ku ti i shkon e ftuar dhe nuk përtoj t’i nxjerr të gjitha ‘inbox’-et një nga një, meqë lozni kaq pisët dhe më fshini videon”, – është shprehur e irrituar Roza Lati.
Më pas Roza i ka kërkuar falje publike Bietës sërish në “Instagram”, teksa thotë se u rrëmbye nga emocionet. Ndoshta kjo përplasje e ka penalizuar ish-konkurrenten e “Big Brother”, e cila do të mungojë në ekran.
Sakaq, Kiara Tito ka konfirmuar rikthimin e saj në ekran në sezonin e ri televiziv, në shtator. Ky ka ardhur si një lajm shumë i mirë për ndjekësit e saj, të cilët kanë qenë në pritje të këtij momenti. Në një intervistë virtuale me ndjekësit e saj në “Instagram”, një nga ndjekësit e saj e pyeti direkt nëse ajo do të rikthehet në ekran në shtator. Përgjigjja e Kiara Tito ishte e qartë dhe entuziaste: “Po”. Ky lajm ka ngjallur shumë interes dhe spekulime në rrjetet sociale se ku do e shohim Kiarën.
Rikthimi i Kiarës në ekran vjen pas shtatzënisë dhe ardhjes në jetë të vajzës. Për herë të fundit Kiarën e kemi parë në ekran me “Fan Club – DWTS” në fund të vitit që shkoi. Deri më tani nuk ka asnjë format për Kiarën, duke bërë që të mendojmë se në fakt rikthimi i saj do të shtyhet edhe pak në kohë. Vetë moderatorja në rrjetet sociale ka zgjedhur që të mos zbulojë më shumë. Ndoshta edhe për faktin se nuk ka asgjë të re nga karriera e saj.
Një periudhë e trazuar ka qenë edhe për Luanën. Pasi u nda nga partneri i saj, Krenar Çoçaj, Luana është edhe jashtë sezonit televiziv. Mesa duket këtë vit do të mungojë “Love Island”, duke bërë që moderatorja mos të rikthehet në TV “Klan”. Bëhet me dije se aktualisht moderatorja është në bisedime për të ndryshuar shtëpi mediatike, ku zërat në rrjet janë duke u shprehur se ka ende mundësi që Luana të rikthehet në “Top Media”. Megjithatë, një fakt i tillë është ende i pakonfirmuar.
/a.r
