Detaje të reja nga atentati ndaj Nazmi Bandulës në lagjen “Partizani” në Shkodër. Gazetari i Klan News Besar Bajraktari ka mësuar nga burime brenda grupit hetimor bëjnë me dije se akoma nuk ka asnjë gjurmë të autorëve të ngjarjes.
Ata kanë përdorur një automjet tip Mercedes-Benz me ngjyrë të bardhë me xhama të zinj, ndërsa të gjitha gëzhojat janë mbajtur në makinë pasi hetuesit nuk kanë gjetur asnjë në vendin e ngjarjes.
Në drejtim të viktimës është qëlluar 13 herë, 6 plumba e kanë prekur në pjesën e sipërme të trupit, çka i shkaktuan vdekjen e menjëhershme. Skena është filmuar nga një kamera sigurie në distancë, e cila nuk ka ndihmuar shumë hetuesit.
Pistat e hetimit janë të shumta për shkak të së kaluarës së 55-vjeçarit në aktivitete kriminale. Gazetari raporton se në të shkuarën Bandula dyshohet të ketë qenë i përfshirë në trafik narkotikësh, trafik armësh dhe prostitucion. Po ashtu, hetuesit nuk përjashtojnë edhe pistën e hakmarrjes, pasi në vitet 2000 Nazmi Bandula bashkë me të vëllanë, janë të përfshirë në një vrasje për një vajzë pranë kinemasë në Shkodër.
Tre vite pas kësaj ngjarje Nazmi Bandulës i është bërë atentat në afësi të Bushatit. Bandula jetonte mes Shkodrës dhe Elbasanit, ndërsa edhe pse ishte i njohur për konflikte të së shkuarës, nuk ruhej asnjëherë dhe lëvizte lirshëm.
/a.r
