Rusët vranë kryebashkiakun e Gostomel pranë Kievit. Kjo është bërë e ditur nga autoritetet lokale në Ukrainë.
“Kryetari i komunës Gostomel – Yuri Illich Prylypko – vdiq duke shpërndarë ushqime për popullatën e uritur”, kanë shkruar ata në faqen e komunës në Facebook.
“Ai vdiq për popullin e tij, vdiq si hero”.
Çfarë po ndodh në Ukrainë- një përmbledhje e ngjarjeve që kanë ndodhur përgjatë orëve të fundit
-Rusia ka njoftuar se po hap korridore të reja humanitare nëpër qytete të shumta të Ukrainës, përfshirë kryeqytetin Kiev, për të lejuar evakuimin e civilëve. Lajmi vjen në një kohë kur prej ditësh përpjekjet e ngjashme në Mariupol kanë dështuar pas bombardimeve të vazhdueshme nga forcat ruse gjatë orëve të armëpushimit.
-Presidenti i Ukrainës Volodymyr Zelensky ka akuzuar Rusinë për vrasjen e civilëve, pasi nga raketat ruse u shua një familje në Irpin, pjesëtarët e të cilës po tentonin të largoheshin.
-Zyrtarët ukrainas të mbrojtjes pretendojnë se forcat e tyre kanë rimarrë qytetin lindor të Chuhuiv.
-Ka pasur sërish bombardime në qytetin port jugor të Mykolaiv.
-Britania e Madhe njoftoi se do t’i japë Ukrainës 100 milionë dollarë shtesë për të ndihmuar në funksionimin e qeverisë ndërsa vendi ndodhet nën pushtim.
-Çmimi i naftës është rritur në nivelin më të lartë që nga viti 2008 pasi SHBA njoftoi se po diskutonte një embargo të mundshme ndaj furnizimeve ruse me aleatët e saj evropianë.
/b.h
