OSHEE po hedh një hap të ri drejt dixhitalizimit të operacioneve, duke përdorur Inteligjencën Artificiale si mjet mbështetës për analizën dhe menaxhimin e proceseve të përditshme. Operatori i Shpërndarjes së Energjisë Elektrike ka hapur një tender për ngritjendhe zbatimin e një platforme të integruar IA, me një fond limit prej 98.65 milionë lekësh.
Projekti parashikon krijimin e një “motori inteligjent analitik” që do të përpunojë në mënyrë të vazhdueshme të dhënat e sistemeve operative të OSHEE-së. Platforma do të shërbejë për automatizimin e analizave në procese kritike, si matjet e energjisë, menaxhimi i rrjetit, mirëmbajtja, ndërprerjet dhe ngarkesat, duke synuar rritjen e saktësisë dhe uljen e gabimeve njerëzore.
Në thelb, sistemi është konceptuar si një asistent inteligjent për operatorët e OSHEE Group. Inteligjenca Artificiale do të mbështesë analizën e të dhënave, monitorimin e sistemeve dhe procesin e vendimmarrjes, pa zëvendësuar rolin e njeriut. Çdo veprim automatik që prek operacionet thelbësore do të kërkojë konfirmim të detyrueshëm nga operatori, çka synon të shmangë rreziqet nga ndërhyrjet e pakontrolluara.
Projekti parashikon gjithashtu ndërtimin e një paneli monitorimi në kohë reale, të integruar me sistemet ekzistuese të OSHEE, si edhe zbatimin e një moduli rekomandues që do të sugjerojë veprime operative të bazuara në modele të Inteligjencës Artificiale, duke ndihmuar stafet teknike në marrjen e vendimeve më të shpejta dhe më të informuara.
Sipas objektivave të përcaktuara nga OSHEE, platforma pritet të zvogëlojë kohën e analizave deri në 80%, të përmirësojë saktësinë e tyre mbi 95% dhe të ulë gabimet manuale në leximin e matësave deri në 70%. Po ashtu, synohet rritja e produktivitetit të ekipeve operative dhe përmirësimi i cilësisë së të dhënave që përdoren në menaxhimin e rrjetit të shpërndarjes së energjisë.
Me këtë projekt, OSHEE synon të modernizojë mënyrën e funksionimit të sistemit të shpërndarjes, duke e orientuar atë drejt analizës së avancuar të të dhënave dhe përdorimit të teknologjive të reja, në një sektor ku efikasiteti operacional dhe saktësia janë vendimtare.
