Sulmet terroriste në Francë, që shkaktuan me qindra të vdekur kanë patur një impakt tepër negativ edhe në kombëtaren shqiptare, e cila mbrëmjen e së premtes kur ndodhi masakra, ishte ende nën efektin e festës miqësore me Kosovën.
Për të, Franca është një atdhe i dytë. Kapiteni Lorik Cana, i cili ka një lidhje të veçantë me Francën për shkak të karrierës së tij me Paris Saint Germain, Olimpique i Marseilles e së fundi me Nantes, e ka të vështirë të flasë për futboll pas një ngjarjeje kaq të rëndë, me pasojë humbjen e jetëve të njerëzve të pafajshëm.
“Një ditë e cila kishte nisur shumë mirë me një ambient gëzimi, u mbyll me një lajm të hidhur. Është një ngjarje shumë e rëndë. Në këtë moment është pak e vështirë për të menduar për ngjarje të tjera. Kjo tregoi se budallallëku i njeriut nuk ka kufi. Franca dhe e gjithë Europa besoj se do të dinë të ecin pëpara”.
Verën e ardhshme në Francë do të zhvillohet kampionati Europian, por për Canën nuk ka vend për panik, pasi masat organizative do të jenë në nivelet maksimale.
“Eventet e mëdha janë gjithë targeti i terroristëve, por unë besoj se organizimi dhe siguria do të jetë në nivelin më të lartë. Sporti duhet të jetë ambasador i paqes dhe nuk na shkon mendja për ngjarje të këqija në “France 2016″.
Duke iu kthyer miqësores vëllazërore me Kosovën, Cana e pranon se trajneri Gianni De Biasi e ka patur të vështirë për punuar në kushte normale, por para Gjerogjisë situata paraqitet krejt ndryshe.
Supersport
