Kreu i Komisionit Qendror të Zgjedhjeve, Ilirjan Celibashi, foli për mënyrën se si do të përgatitet fleta e votimit për zgjedhjet e 11 majit.
Gjatë iintervistës në Vizion Plus, në emisionin Quo Vadis, Celibashi tha se janë ende në proces diskutimi se si do të jetë kjo fletë votimi, me numra apo me emra.
Ai gjithashtu përmendi se çdo forcë politike ka detyrimin të ketë kandidatët e saj në të 12 qarqet e vendit.
Pjesë nga biseda:
Borakaj: Si do të jetë fleta e votimit në zgjedhjet e 11 majit?
Celibashi: Do të ketë një numër të madh kandidatësh, sidomos Tirana që do të jenë në fletën e votimit. Jemi akoma në proces diskutimi se si do të jetë kjo fletë votimi, me numra apo me emra. Unë ende jam i idesë që në fletën e votimit duhet të vendoset edhe emri i kandidatit jo veç numri. Sipas meje, fleta e votimit duhet të përmbajë emrat e kandidatëve, veçanërisht kur flasim për kandidatët, për të cilët do të ketë votë preferenciale, mendoj se identifikohen më qartë nëpërmjet emrit të tyre se sa nëpërmjet numrit. Problemi është madhësia e fletës së votimit, sidomos për Tiranën se është një numër i madh.
Borakaj: Keni dizenjuar se si do të jetë një fletë votimi, apo është ende herët?
Celibashi: Edhe herët nuk është. Jemi duke punuar, për pak ditë do të kemi disa modele. Ende nuk e kemi menduar. Mund të jetë një fletë e palosur ndryshe, mund të jetë si bllok, por do ta diskutojmë për të mos pasur keqkuptime.
Borakaj: Çdo forcë politike ka detyrimin për të pasur kandidatët në të 12 qarqet?
Celibashi: Po, duhet të kenë në të gjitha qarqet.
