Kryetari i Grupit Parlamentar të Partisë Socialiste, Taulant Balla, ka marrë pjesë në aktivitetin përkujtimor me rastin e 82-vjetorit të Masakrës së 4 Shkurtit, duke nderuar kujtimin e viktimave të terrorit nazist.
Gjatë fjalës së tij, Balla u shpreh se Tirana dhe e gjithë Shqipëria përulen me respekt para bijve dhe bijave të vendit që u vranë mizorisht në këtë ngjarje të rëndë historike. Ai theksoi se 4 Shkurti mbetet një plagë e hapur në kujtesën kombëtare dhe një dëshmi e çmimit të lartë që populli shqiptar pagoi për t’u rreshtuar në anën e duhur të historisë botërore.
Sipas Ballës, Masakra e 4 Shkurtit nuk mund të shkëputet nga Lufta Antifashiste Nacionalçlirimtare, pasi ajo ishte pjesë e një përpjekjeje të vazhdueshme për të dëshmuar rezistencën e një populli që kishte bërë zgjedhjen e tij historike për të luftuar kundër nazi-fashizmit për liri dhe dinjitet njerëzor.
Ai nënvizoi se Lufta Antifashiste Nacionalçlirimtare përfaqëson një nga momentet më vendimtare në historinë kombëtare të Shqipërisë, duke mbetur një pikë referimi për vlerat e lirisë dhe sakrificës.
“Në këtë 82 vjetor të masakrës së 4 shkurtit, Tirana dhe gjithë Shqipëria përulet me nderim e respekt përpara kujtimit të bijve dhe bijave të saj të cilët u vranë mizorisht nga terrori nazist.
4 shkurti mbetet një plagë e hapur në kujtesën tonë kombëtare dhe një dëshmi e çmimit të lartë që populli shqiptar e pagoi me gjakun e bijve të tij më të mirë për tu rreshtuar në anën e duhur të historisë botërore. Masakra e 4 shkurtit s’mund të kuptohet se shkëputet nga Lufta Antifashiste Nacional Çlirimtare. Ajo ishte pjesë e një përpjekje të vazhdueshme për të dëshmuar rezistencën e një populli që kishte bërë zgjedhjen e tij historike për të luftuar nazi-fashizmin për liri dhe dinjitet njerëzor. LANÇ përfaqëson një nga momentet më vendimtare në historinë tonë kombëtare”, deklaroi Balla.
Natën e 4 shkurtit të vitit 1944 pushtuesit nazistë vranë 84 persona dhe arrestuan 300 të tjerë në Tiranë.
