Publikohet nje kopje e vendimit të Gjykatës së Krimeve të Rënda, e cila ka caktuar masën e sigurisë “arrest me burg” ndaj 4 punonjësve të policisë së Qafë Thanës, që akuzohen për trafik droge.
Sipas vendimit, mes provave të siguruara nga prokuroria janë edhe pamjet filmike të kamerave të sigurisë, që kanë fiksuar një punonjës policie në kabinën e shoferit maqedonas, duke marre diçka. Kjo ka bërë që te forcohen dyshimet për implikimin e policisë, raporton abcnews. Prokuroria për krime të rënda zbardh detaje të trafikut të 8 tonëve hashash nga Maqedonia në Shqipëri dhe më pas drejt Italisë, për të cilën janë arrestuar 4 efektivë të policisë.
ABC News ka siguruar kopjen e vendimit të masës së sigurisë së 4 punonjësve të policisë së pikës së kalimit kufitar në Qafë Thanë, ku evidentohen provat ndaj të dyshuarve, të akuzuar për trafik droge. Në mesin e provave, që kanë bindur gjykatën në caktimin e masës së sigurisë Arrest me burg për të dyshuarit, janë evidentuar edhe pamjet e kamerave të sigurisë së pikës së kalimit kufitarë në Qafë Thanë. Sipas përshkrimit të pamjeve të datës 4 shkurt, që janë pasqyruar në vendim, thuhet se në orën 17:14 minuta kamioni me drejtuesin Zoran Stajonoski i ngarkuar me 8 ton hashash afrohet pranë peshores që ndodhet afër kabinave të kontrollit të punonjësve të policisë.
Aty zbret shoferi dhe kthehet pas 7 minutave. Por një minutë pas kthimit të shoferit Stajonoski në kabinën e kamionit, aty afrohet një punonjës policie i veshur me jelek fosforishent, i cili hap derën e pasagjerit të kamionit, duke u futur në kabinën e mjetit. Nga pamjet e përshkruara nga oficeri policisë gjyqësore, thuhet se punonjësi I policisë merr ose lë diçka brenda kabinës, pa qenë në gjendje të dallohet se çfarë dhe largohet. Vetëm pas largimit të policit shoferi Stajanoski afrohet pranë pikës së kontrollit për t’Iu nënshtruar procedurave të hyrjes.
Ky moment, thuhet nga prokuroria është edhe njëri nga dyshimet kryesore se efektivët e policisë kanë bashkëpunuar në lehtësimin e kalimit të kamionit me 8 ton hashash në pikën kufitare të Qafë Thanës. Aty veç procedurave të zakonshme, kamionit i është vendosur plumbçja dhe vulosur rimorkio, e më pas është lejuar të kaloi drejt Durrësit, transit nëpër Shqipëri. Në vendim, thuhet se punonjësit e policisë nga nxitimi nuk e kanë regjistruar në sistemin TIMS hyrjen e kamionit brenda territorit shqiptar ndërsa e gjithë procedura tjetër dyshohet se është bërë fiktivisht për të lehtësuar kalimin e drogës. Ky kamion, më pas ka kaluar në portin e Durrësit pa u kontrolluar drejt Italisë, ku është bllokuar nga policia në një parking publik në Ankona.
a.ç
