Numër rekord vdekjesh është regjistruar në 24 orët e fundit në provincën kineze të Hubei nga koronavirusi që shpërtheu në Wuhan. 70 viktimat e fundit e kanë çuar në 565 numrin e atyre që kanë humbur jetën nga epidemia që po frikëson botën.
Si të mos mjaftonte shifra e lartë e vdekjeve janë konstatuar rreth 3000 raste të reja të personave të infektuar duke e çuar numrin e përgjirlthshëm në 28 114 në të gjithë botën kurse numri atyre që kanë lënë spitalet si të shëruar është 1245.
Fotografia e epidemisë e azhornuar në internet dhe e hartuar nga Qendra për Shkencë dhe Sisteme Inxhinierike e Universitetit Amerikan Johns Hopkins, tregon se ritmi i dëmeve njerëzore të shkaktuara nga virusi nuk ka tendenca ngadalësimi.
Ndërkohë, në tragetin ‘Diamond Princess’ i bllokuar në karantinë në gjirin e Yokohama në Japoni, numri i personave të infektuar nga koronavirusi është rritur në 20, nga 10 që u konstatuan fillimisht. Autoritetet shëndetësore japoneze kanë testuar deri tani 273 nga afro 3,700 pasagjerë, përveç ekuipazhit. Japonia e vendosi anijen në karantinë dy ditë më parë pasi disa udhëtarë kishin shfaqur simptoma të sëmundjes.
Lajmi më shqetësues i ditës së djeshme në lidhje me përhapjen e virusit ishte ai i një fëmije të porsalindur i cili rezultoi pozitiv me koronavirus në Wuhan. Sipas mjekëve të spitalit lokal pediatrik, fëmija e kishte marrë infeksionin nga nëna e cila ishte edhe ajo e infektuar në muajin e fundit të shtatzanisë.
Ndërkohë e gjithë bota është e angazhuar në betejën kundër përhapjes së virusit dhe jashtë Kinës, ku në fakt, infeksioni duket se është nën kontroll pothuajse kudo.
Ekzaminimi në aeroportet kryesore ndërkombëtare i kthyer tashmë në domosdoshmëri, është futur në regjim me kohë të plotë. Italia gjithashtu ka filluar të kontrollojë temperaturën e pasagjerëve në të gjitha fluturimet, jo vetëm ato ndërkontinentale. Kontrollet e skanerit termik të rezervuara më parë vetëm për pasagjerët që vinin nga zonat e prekura nga virusi vdekjeprurës, ka nisur të shtrihet në të gjitha fluturimet, përfshirë fluturimet nga Europa.
Shkencëtarët britanikë pretendojnë se i janë afruar shumë prodhimit të vaksinës kundër koronavirusit të ri, dhe thonë se diçka tashmë mund të testohet tek kafshët. Por për realizimin e saj mesa duket mungojnë fonde të konsiderueshme. Kjo duket të jetë arsyeja pse Organizata Botërore e Shëndetit kërkoi 675 milion dollarë për t’i ndihmuar vendet të përballen me përhapjen e pritshme të virusit të ri që është shfaqur në Kinë. Filozofia është e thjeshtë, siç shpjegoi edhe drejtori i OBSH-së Dr. Tedros Adhanom Ghebreyesus: Më mirë të investoni sot sesa të paguani më vonë. Sipas tij, nga 675 milion që OBSH ka kërkuar, rreth 70% do duhet të përdoret për financimin e operacioneve të OBSH. Pjesa tjetër është posaçërisht për vendet që janë në rrezik dhe kanë nevojë për mbështetje.
Kina zyrtare dje ka njoftuar se ka identifikuar dy ilaçe të afta për të ndaluar koronavirusin, por lajmi është marrë me rezerva nga OBSH e cila ka reaguar duke thënë se ende nuk ka asgjë konkrete dhe as terapi efektive për të zhdukur infeksionin.
Strategjia e kontrollit e miratuar nga Kina duket se ka dhënë efektet e para. Mbi 100 milion kinezë qëndrojnë të mbyllur në shtëpitë e tyre në provincën e Hubei duke bërë që përhapja e infeksionit përtej rajonit Hubei të jetë e kufizuar, gjë e cila ka rritur shpresat se rreziku i pandemisë mund të shmanget.
Koronavirusi gjithashtu ka shkaktuar edhe pasoja politike.
Partia Komuniste Kineze ka pranuar se ka patur vonesa në përgjigjen e menjëhershme që duhej në momentet e para të shpërthimit të epidemisë dhe dje në përpjekje për të shuar edhe polemikat, sëpata e saj e rëndë ka rënë mbi kokat e rreth 400 zyrtarëve lokalë duke i shkarkuar ata nga postet me akuzën e keqmenaxhimit të epidemisë.
