Sot bëhen 70 ditë që kur Rusia filloi agresionin ushtarak duke pushtuar Ukrainën. Kievi shpreson sot se do të hapë 4 korridore humanitare.
Por gjatë natës pati shpërthime në disa qytete dhe rajone nga Lviv në Transcarpathia, në kufirin me Hungarinë, që është goditur për herë të parë.
Gjashtë stacione treni në Ukrainën qendrore dhe perëndimore u bombarduan në mbrëmje.
Ndërkohë Bjellorusia, aleat i ngushtë rus dhe fqinj i Ukrainës në veri të saj, ka nisur stërvitjet ushtarake në shkallë të gjerë. Kjo lëvizje është shkak potencial për alarm në Ukrainë.
Ministria bjelloruse e mbrojtjes tha se stërvitjet përfshinin testimin e mjeteve të ushtrisë së saj për gatishmërinë luftarake, por shtoi se stërvitja nuk përbën kërcënim për fqinjët.
Megjithatë, Ukraina do të vëzhgojë nga afër Bjellorusinë, raporton BBC.
Kur Rusia po godiste veriun e Ukrainës, duke përfshirë kryeqytetin Kiev, disa javë më parë, zyrtarët ukrainas pretenduan se disa nga raketat dukej se vinin nga ana bjelloruse e kufirit.
Ministria britanike e mbrojtjes ka dhënë një përditësim mbi situatën në terren në Ukrainë këtë mëngjes.
Inteligjenca britanike bën të ditur se Rusia ka vendosur 22 grupe taktike batalionesh pranë Izium, në rajonin e Kharkiv të Ukrainës lindore. “Kjo është përpjekje për të avancuar përgjatë boshtit verior të Donbas”, thekson ministria.
“Megjithë përpjekjet për të thyer mbrojtjen e Ukrainës dhe për të krijuar vrull, Rusia ka shumë të ngjarë të synojë të vazhdojë përtej Izium për të kapur qytetet e Kramatorsk dhe Severodonestsk”.
Kjo do të “konsolidonte kontrollin ushtarak rus në Donbasin verilindor”, thotë Ministria e Mbrojtjes.
g.kosovari
