Gjykata e Apelit në Shkodër la në fuqi të premten masën e sigurisë në arrest me burg për Dorian Petoku, i arrestuar dy vjet më parë, janar 2019, me qëllim ekstradimi për Itali, ku akuzohet për trafik narkotikësh në disa raste dhe në sasi të mëdha.
Siç del nga vendimet e gjyqësorit Petoku është përfshirë në një çështje të komplikuar ekstradimi, që zgjat prej dy vjetësh, ndërsa afatet e mbajtjes së tij në qeli po ashtu janë zgjatur disa herë për shkak të ndryshimit të kërkesës së drejtësisë italiane.
Nga një vendim tjetër i Gjykatës së Apelit në Shkodër, mbi aprovimin e zgjerimit të ekstradimit të Petokut, del se ndaj tij ishte marrë një vendim për ekstradim, i cili kishte marrë formë të prerë në dhjetor të vitit 2019, Por ky ekstradimin nuk ishte ekzekutuar pasi Gjykata e Romës kishte kërkuar revokimin e tij dhe një ekstradim të ri bazuar në një urdhër të dytë arresti ndërkombëtar të lëshuar në maj 2019 me akuzën “trafikim të lendëve narkotike në mënyrë të përsëritur”.
Mbrojtja e Petokut ka kundërshtuar si zgjatjen e afateve të paraburgimit edhe zgjerimin e ekstradimit, pas revokimit të vendimit të parë, por kjo nuk është pranuar nga Gjykata e Apelit Shkodër.
Sipas asaj që thuhet në vendimin e gjykatës për “zgjerimin e ekstradimit”, Petoku ishte arrestuar në janar 2019. Policia atëherë njoftoi se ai kërkohej nga Interpoli pas urdhër arrestit ndërkombëtar nga Italia për trafikim nga Brazili të një sasie prej 644 kilogramësh kokainë në bashkëpunim me disa persona të tjerë të arrestuar në Itali.
Menjëherë pas arrestimit ndaj tij filluan procedurat e ekstradimit. Njëra pas tjetrës gjykata e Lezhës, ajo e Apelit në Shkodër dhe Gjykata e Lartë lanë në fuqi vendimin për ekstradim. Vendimi mori formë të prerë në dhjetor 2019, por ekstradimi nuk u krye.
Gjykata e Apelit në vendimin për “zgjerimin e ekstradimit”, bën me dije, se kur çdo gjë ishte gati për ekstradim në bazë të urdhërit të parë të arrestit, drejtësia italiane kërkoi revokim dhe hapjen e një procedure të re ekstradimi. Sipas vendimit në Ministrinë e Drejtësisë, e cila është e fundit në hallkat e shtetit shqiptar për ekstradimit, erdhën dy kërkesa nga Italia. Njëra për revokim të ekstradimit për të cilin ishte vendosur dhe tjetra për nisjen e procedurave për një ekstradim të dytë bazuar mbi urdhërin e arrestit të majit 2019.
Procedura për ekstradimin e dytë duket se ka vënë në siklet drejtësinë shqiptare. E përballur me situtën prej COVID-19 dhe pezullimin e punës për disa kohë, çështja që duhej të kishte përfunduar në pak muaj u shty disa herë. Petoku përmes avokatëve fillimisht kundërshtoi “zgjerimin e ekstradimit” dhe shuarjen e masës së sigurisë, por kërkesat e tij janë rrëzuar.
“Afatet e paraburgimit nuk duhen lidhur me momentin e caktimit të masës së sigurimit për efekt të kërkesës se parë të për ekstradim. Por për efekt të kërkesës se dytë për ekstradim, pasi kerkesa e parë siç u argumentua me lart është revokuar”, thuhet në vendimin e Gjykatës së Apelit Shkodër. Ndërsa siç del nga vendimet ekstradimi për Petokun është miratuar për të dytën herë në gjykata.
Gjykata e Apelit citon procedurën e kërkuar nga Italia si arsye për vonesën, ndërsa po ashtu vë në dukje situatën e krijuar nga pandemia. “Është e vertetë se në raportin kalendarik afatet në gjykimin në shkallë të parë kanë kaluar. Por në kushtet e pandemisë dhe të akteve ligjore, janë vendosur pezullimet e afateve proceduriale”, thuhet në vendim. /Birn/
