Shpenzimet kapitale për 7-mujorin e vitit buxhetor 2016, janë realizuar në masën 81%, duke paraqitur në këtë mënyrë një rritje krahasuar me një muaj më parë, bëri të ditur ministria e Financave.
Sipas të dhenave nga ky dikaster, në vijim të analizës së ecurisë së realizimit të investimeve publike me financim të brendshëm dhe të huaj për 7- mujorin e vitit 2016, është konstatuar një realizim në masën 75% i atyre me financim të huaj të planifikuara për këtë periudhë, ndërkohë që realizimi i investimeve me financim të brendshëm paraqitet në nivele më të larta, përkatësisht 89% e planit.
Krahasuar me një muaj më pare, ka rritje të realizimit të investimeve me financim të huaj.
Sipas ministrise se Financave, në përgjithësi ekziston një trend pothuajse i njëjtë realizimi i këtyre shpenzimeve nga të gjitha ministritë e linjës, kjo dhe si një efekt i vonesave proceduriale dhe procesit të shtrirjes së mëvonshme të likujdimit të shpenzimeve për investime.
Gjithashtu vlen të theksohet fakti që ky trend është i zakonshëm për këtë periudhë buxhetore, si shkak i paraqitjes me vonesë të situacioneve të punimeve për t’u paguar dhe vonesës në disbursim. Në këtë mënyrë pritet që disbursimet për realizimin e projekteve si me financim të huaj, ashtu edhe me financim të brendshëm, të rriten në muajt në vazhdim./a.m.
