Sot, në Ditën e Mësuesit, kryebashkiaku Veliaj iu bashkua qindra nxënësve të shkollave të Tiranës, të cilët mbollën pemë kushtuar mësuesve të tyre. E në një prononcim për median, kryetari i bashkisë së kryeqytetit nuk harroi t’i kushtojë një kujtim të veçantë ish-mësueses së tij kujdestare, Polikseni Ndrenikës, ose zyzh Polit siç e quajti ai, bashkëshortja e aktorit të madh të skenës shqiptare, Robert Ndrenika, e cila sot fatkeqësisht nuk jeton më.
“Në këtë 7 Mars edhe unë mbolla një pemë për ish-mësuesen time, Polikseni Ndrenikën. Ajo fatkeqësisht nuk jeton më, por i dedikoj asaj gjithë durimin dhe fokusin tek puna dhe jo tek zhurma. Mbaj mend kur ishim në ato klasat tona të zhurmshme, porosia e zysh Polit ishte fokusohu të mbarosh detyrat, pasataj shko dhe bëj gallatë me shokët. Edhe sot më jehon shprehja e saj: të fokusohemi tek ajo që është e rëndësishme, të kryejmë detyrat tona, pastaj zhurma apo gjithë gjërat që na bëhen pengesë, i sqaron koha”, u shpreh Veliaj, duke kujtuar një çast nga koha kur si çdo adoleshent i atyre viteve, duhet të vendoste për gjëra të rëndësishme.
