Kreu i “Shqipëria Bëhet”, Adriatik Lapaj, ka reaguar pas përfundimit të numërimit të votave dhe ndarjes së mandateve, duke akuzuar sistemin elektoral si të padrejtë dhe të manipuluar në favor të partisë në pushtet. Sipas tij, pavarësisht se koalicioni i tij ka marrë afro 63 mijë vota, ka arritur të sigurojë vetëm një mandat, ndërkohë që Partia Socialiste, me 10 mijë vota ka nxjerrë një deputet të plotë.
“PS ka marrë vota sa për 73 mandate, por ligji elektoral i padrejtë i ka dhënë 83”, denoncoi Lapaj, duke e cilësuar sistemin si të dizajnuar për të favorizuar dy partitë e mëdha dhe për të shtypur alternativat e reja që sfidojnë korrupsionin dhe status quo-në politike.
Në fund të reagimit të tij, ai bën thirrje për ndryshim të menjëhershëm të sistemit elektoral, duke propozuar modelin e Kosovës, proporcional kombëtar me lista të hapura, si një alternativë më e drejtë dhe transparente. “Nuk ka kthim pas! Shqipëria Bëhet është e hapur për këdo që beson te vlerat,” përfundoi Lapaj.
Postimi i plotë i Adriatik Lapajt:
Lëvizja Shqipëria Bëhet u kthye në parti politike në dt. 30 shtator 2024.
Për 8 muaj, me gjithë vështirësitë që ju i dini, i’a dolëm të renditemi forcë e 3 politike në vend (përballë atyre që kërcënojnë, blejnë dhe vjedhin votë).
Faleminderit secilit që na besoi me votë!
Sistemi elektoral u dëshmua para të gjithëve si i padrejtë. PS e nxori 1 mandat me afro 10,000 vota, ndërsa koalicioni ynë me afro 63,000 (deri tani).
PS ka marrë vota sa për 73 mandate, por ligji elektoral i padrejtë i ka dhënë 83.
Koalicioni ynë duhet të kishte të paktën 6 mandate. Duhet ndryshuar ligji elektoral. Shikoni modelin e Kosovës, proporcional kombëtar me lista të hapura.
Lëvizja Shqipëria Bëhet është e hapur për këdo beson te vlerat, të na bashkohet!
Nuk ka kthim pas!
