Gjykata e Tiranës përfundoi në dy seanca gjyqësore gjykimin ndaj një ish-efektivi policie, të akuzuar për tentativën e grabitjes së një taksisti me armën e shërbimit. I pandehuri Eduart Budini, 30 vjeç, ish-efektiv i Forcave të Ndërhyrjes së Shpejtë të Fierit, u shpall i fajshëm për “vjedhje me armë”, mbetur në tentativë dhe u dënua me 9 vjet burg.
Ai përfitoi uljen e një të tretës së këtij dënimi, për shkak se dosja u gjykua me kohë të shkurtuar. Budini u identifikua si autor i ngjarjes në shkurt të vitit 2016, kohë kur Policia e Tiranës publikoi në media pamjet filmike të tentativës së grabitjes dhe kërkoi ndihmën e qytetarëve.
Gjithë ngjarja kriminale ishte filmuar nga një kamera e instaluar në kabinën e autoveturës taksi, e cila i kishte filmuar fytyrën dhe veprimet e tij.
Pas arrestimit dhe gjatë gjykimit, ai pranoi të ishte autor i tentativës së grabitjes, por se të gjitha veprimet e tij kishin ndodhur nën efektin e alkoolit dhe nën gjendje të rënduar psikologjike për shkak të ndarjes nga gruaja.
Ai shprehu pendesë për përdorimin e armës së shërbimit dhe theksoi se pas ngjarjes kishte shkuar te vendi i taksive për t’i kërkuar falje shoferit por, nuk e kishte gjetur. Budini e ka ankimuar në Apel vendimin ndaj tij.
Sipas vendimit të shpallur nga një treshe gjyqtarësh të kryesuar nga gjyqtari Gerd Hoxha, mesditën e 9 nëntorit 2015, i pandehuri Budini ka marrë një taksi pranë qendrës së Tiranës, ku i ka kërkuar drejtuesit të saj ta çonte në zonën e Yzberishtit.
Gjatë rrugës, ndërmjet të pandehurit dhe shoferit të taksisë janë zhvilluar biseda të zakonshme, gjatë të cilave i pandehuri ka gënjyer, duke paraqitur të dhëna të ndryshme për vete, si dhe është munduar t’i shmanget shikimit të të dëmtuarit nëpërmjet pasqyrës së brendshme të kabinës së mjetit.
Në Yzberisht, pasi e ka orientuar shoferin të ndalojë në një rrugë të paasfaltuar, i pandehuri ka nxjerrë armën tip pistoletë, duke ia drejtuar shoferit në shpatullën e djathtë.
Ndërsa, me dorën e majtë ku mbante veshur një dorezë të zezë, e ka shtrënguar fort në qafë.
Këto veprime i pandehuri i ka kryer të shoqëruara me shprehjen “të mos bënte asnjë lëvizje dhe t’i jepte shpejt lekët se sapo kishte dalë nga burgu”.
Shoferi i ka lënë në dorë shumën që kishte dhe ka refuzuar t’i jepte unazën që kishte në gisht. Në këtë moment, shoferi u ka thënë dy kalimtarëve të njoftojnë policinë, ndërsa i pandehuri ka futur armën në brez dhe është larguar duke ecur normalisht./panorama/a.k
