Edi Rama ka pritur në takim këtë të martë, 28 prill, ambasadoren e Shteteve të Bashkuara të Amerikës në Greqi, Kimberly Guilfoyle.
Mes palëve është nënshkruar një marrëveshje mjaft e rëndësishme në sektorin e energjisë. Në fakt, lidhur me këtë, vetë ambasadorja ka bërë një postim në rrjetin social “X”.
Jemi krenarë të ndërtojmë mbi punën e shkëlqyer të Doug Burgum, Chris Wright dhe Këshillit Kombëtar për Dominimin Energjetik. Kur Shtetet e Bashkuara, Shqipëria dhe Greqia bashkëpunojnë, ky rajon bëhet më i lidhur, më i sigurt dhe më i begatë”, bën me dije Guilfoyle.
Venture Global është një kompani amerikane, e fokusuar në prodhimin dhe eksportin e gazit natyror të lëngshëm nga SHBA-të, ndërsa Aktor LNG lidhet me grupin Aktor Group, i cili është grek dhe operon në infrastrukturë dhe projekte energjetike në rajon.
Ky është takimi i dytë mes Ramës dhe ambasadores në një kohë relativisht të shkurtër. Më 11 mars 2026, Guilfoyle mbërriti në ambientet e Kryeministrisë, vizitë që kreu i qeverisë e përshkroi kështu:
Ambasadorja Kimberly Guilfoyle ka ardhur për të bërë një takim njohjeje për të diskutuar për disa çështje, që janë çështje të interesit të lartë amerikan në rajon, që kanë të bëjnë me energjinë, me bashkëpunimin rajonal, me qasjen ndaj forcave të treta, me faktorë të tretë, dhe nga ana tjetër kini parasysh se ambasadorja e SHBA-ve në Athinë është përfaqësuese e njohur në politikën amerikane, drejpërdrejtë e rrethit të ngushtë të Shteteve të Bashkuara.
Ky reagim i numrit një të kabinetit erdhi dy ditë pas takimit, që u shoqërua nga spekulime të shumta, sidomos nga opozitarët. Kreu i grupit parlamentar të Partisë Demokratike, Gazment Bardhi, deklaroi në “Opinion” se ambasadorja ka ardhur në Shqipëri lidhur me disa investime që lidhin Tiranën me Athinën, që sipas tij janë bllokuar nga qeveria shqiptare.
“Po meqenëse po merremi me komentet e veshjes, të merremi me një gjë thelbësore. Projekti lidhet me Athinën dhe disa vende të tjera. Pra, Bullgarinë dhe vende të tjera. Është një projekt rajonal dhe është bllokuar pjesa e këtij projekti në Shqipëri“, deklaroi demokrati.
Guilfoyle është një nga njerëzit më të besuar të presidentit amerikan Donald Trump. Për një periudhë të gjatë ajo ka bashkëjetuar me djalin e presidentit, Donald Trump Jr., dhe prej vitesh njihet si një nga figurat kyçe të rrethit të ngushtë të Trump në politikën amerikane.
