“6 milionë euro për damkën e Berishës”, Rama: Ku u gjetën ato para për hallin e një njeriu?

Kryeministri Edi Rama ka zhvilluar një takim me gratë dhe vajzat në Vlorë.

“Mes interesit të një populli të tërë dhe hallit të një njeriu të vetëm; mes Shqipërisë me BE-në zonjë në Europë dhe Shqipërisë me Bufin e Kënetës prapë në gropë…kush zgjedh të parën Shqipërinë, voton numrin 5”, shprehet kryeministri Rama.

Gjithashtu Rama nënvizoi se gratë dhe vajzat janë garancia se në 11 majit PS do të marrë rezultatin e duhur për Shqipërinë në BE.

“Kur flasim për gropën këtu në Vlorë, ju dhe sidomos ata që e kanë jetuar si prindër katastrofën e ’97 e dinë shumë mirë se për çfarë po flasim. Nuk është aspak e ekzagjëruar të flasësh sot për katastrofën e atij viti që këtu në Vlorë hapi edhe plagën më të madhe. Është po i njëjti personazh që vjen vërdallë për të kërkuar votën për hallin e tij personal. Janë paguar 6 milionë euro, thuhet nga patriotë, ju kujtohet që herën e kaluar, Luli u bë leckë. 6 milionë euro për të hequr damkën e një personi non grata janë shumë për të mos bërë pyetjen ku u gjetën ato para”, tha ai.