Me miratimin e 6 ligjeve themeltare të reformës në drejtësi, që do të votohen paketë të enjtën, do të nisë dhe puna për ngritjen dhe krijimin e institucioneve të reja të drejtësisë.
Kështu deklaroi deputeti socialist Fatmir Xhafaj, fill pasi doli nga mbledhja e grupit parlamentar të PS këtë të hënë.
Kreu i komisionit të posaçëm të reformës, shtoi se në mbledhje bëri të njohur për të gjithë deputetët 6 ligjet e mbetura themeltare(Vettingu si ligj ka hyrë në fuqi tashmë), që bëjnë më në fund funksionale reformën në drejtësi.
“Duhet të bëjmë një dallim, midis projekteve që përbëjnë reformën. Natyrisht, projekti themelor, ishte ndryshimi kushtetues, më pas 7 ligjet themeltare, ndër to ligji i Vettingut që u miratua dhe më pas të tjerat. Me miratimin e këtyre ligjeve këtë të enjte, mund të fillojë normalisht procesi i ngritjes së institucioneve të reja.”- tha Xhafaj.
Por me reformën në drejtësi, pas ndryshimeve kushtetuese dhe pas miratimit të 7 ligjeve themelore, ndryshime të tjera ligjore do të pasojnë në të paktën 40 ligje të vendit. Për to, Xhafaj tha se do të ketë kohë për diskutimin dhe miratimin e tyre.
“Me përfundimin e ligjeve proritare, do të fillojë puna për ligjet e tjera.
Po marr kodin e procedurës penale, të procedurës civile, etj etj, që janë të rëndësishme, por që nuk bllokojnë procesin e implementimit të reformës.”- shtoi ai./java/.a.k
