Lufta në Ukrainë hyn sot në ditën e saj të 58-të. Udhëheqësi i Çeçenisë, Ramzan Kadyrov, njofton se Rusia ka marrë kontrollin e godinës administrative të uzinës së çelikut Azovstal dhe territorin ngjitur.
Ndërkohë mediat e huaja kanë raportuar se Rusia ka refuzuar propozimin e Ukrainës për një armëpushim për Pashkët Ortodokse.
Kur kanë kaluar gati dy muaj nga ofensiva ruse, Mariupol është ende në qendër të ngjarjeve më tragjike të luftës. Tre të katërtat e popullsisë thuhet se u larguan nga Donetsk, ndërsa Kievi denoncoi se ‘deri në 9,000 banorë mund të varroseshin në një varr masiv në Manhush. Më shumë se 7,000 krime lufte janë nën hetim.
Ndërkohë, SHBA po përgatitet të dërgojë një paketë të konsiderueshme ndihme ushtarake në mbrojtje të Donbasit. Në një videomesazh për ukrainasit, Zelensky i bën thirrje që të mos japin asnjë të dhënë personale për forcat ruse pasi po planifikojnë të mbajnë referendum për zonat e pushtuara.
Faqja e lajmeve pro-Kremlinit Readovka postoi njoftimin, të bërë nga Ministria e Mbrojtjes së Moskës, se 13,414 ushtarë rusë u vranë dhe 7,000 të tjerë u zhdukën në Ukrainë, informacion i cili më pas u fshi.
Sot vazhdon evakuimi i civilëve nga Mariupoli. Qytetarët nxirren jashtë nga banesat mirëpo ka ende njerëz të moshuar në bodrume, shumë prej të cilëve nuk mund të lëvizin vetë.
Organizata e Shteteve Amerikane (OAS), forumi më i vjetër në botë për diplomacinë rajonale, ka pezulluar pjesëmarrjen e Rusisë si vëzhguese e përhershme në institucion deri në “përfundimin e armiqësive të saj”.
