Një grup prej 58 ish-ambasadorësh të Bashkimit Evropian i janë drejtuar me një letër të hapur udhëheqjes së BE-së, duke bërë thirrje për masa urgjente ndaj Izraelit dhe njohjen zyrtare të shtetit të Palestinës.
Letra përbën një akt të fortë akuze ndaj politikave të ndjekura nga qeveria izraelite dhe një kritikë të ashpër ndaj qëndrimit të Bashkimit Evropian.
Në tekstin e letrës dënohet masakra e Hamasit më 7 tetor 2023, por theksohet se ajo “nuk mund të justifikojë pamjen e përditshme të një Izraeli që kryen krime të rënda ndaj popullit palestinez, sidomos në Gaza, por edhe në Bregun Perëndimor të pushtuar”.
Sipas tyre, fushata izraelite përbën një proces të qëllimshëm brutalizimi, çnjerëzimi dhe zhvendosjeje të detyruar të popullsisë, të cilën e cilësojnë si “krim të rëndë lufte” dhe “spastrimi etnik”.
Ish-diplomatët shprehen të alarmuar për zhvendosjen masive të civilëve palestinezë në “zona përqendrimi”, të cilat i përshkruajnë si kampe militarizuara ku njerëzit mbahen në kushte të padurueshme për t’i detyruar të largohen “vullnetarisht”.
Letra dënon ashpër mosveprimin e BE-së, duke e cilësuar si bashkëfajësi përballë krimeve dhe një rrezik për reputacionin dhe influencën ndërkombëtare të unionit. Për këtë arsye, ata kërkojnë:
•Ndërprerjen e menjëhershme të eksporteve të armëve dhe pajisjeve me përdorim të dyfishtë drejt Izraelit;
•Ndalimin e çdo forme tregtie me vendbanimet ilegale izraelite në territoret e pushtuara palestineze;
•Pezullimin e marrëveshjeve tregtare preferenciale me Izraelin dhe përjashtimin e tij nga programet kërkimore e akademike të BE-së;
•Vendosjen e sanksioneve ndaj zyrtarëve izraelitë përgjegjës për krime lufte;
•Njohjen zyrtare të shtetit të Palestinës në Konferencën e OKB-së që zhvillohet më 28-29 korrik në Nju Jork.
“Bota do të mbajë mend se si reagoi Bashkimi Evropian përballë kësaj tragjedie. Heshtja dhe neutraliteti përballë një gjenocidi janë bashkëfajësi. Mosveprimi inkurajon xhelatët dhe tradhton çdo parim që BE-ja pretendon të mbrojë”, shkruhet në përmbyllje të letrës.
Apeli i ish-ambasadorëve përbën një thirrje të qartë për ndërgjegjësim dhe veprim konkret nga ana e BE-së, në një moment vendimtar për të ardhmen e konfliktit izraelito-palestinez.
