Kanë kaluar 51 vite nga elektrifikimi i plotë, dhe Shqipëria ende nuk ka arritur të prodhojë energji elektrike për të furnizuar plotësisht konsumatorët. Shkak sipas ekspertëve është mungesa e investimit tek prodhimi i energjisë nga dielli dhe era.
Edhe pse sektori energjetik ka përparuar dhe është zhvilluar problemi i pazgjidhur është varësia nga kushtet atmosferike.
“Sektori energjetik shqiptar bazohet tek burimet hidrike, që përpos avantazheve e ka mbajtur sektorin të pazhvilluar, pasi ne prej shumë kohësh jemi importues të energjisë”, thotë Lorenc Gordani ekspert për çështjet e energjisë.
Në kushtet kur gjithë bota rrezikon të preket nga kriza energjetike, ekspertët shohin vetëm një zgjidhje për Shqipërinë.
“Duhet të diversifikojmë ofertën tonë të zhvillimit, dhe të mos mendojmë për koncesione në burimet hidrike. Me investime në modernizimin e sektorit dhe me politika energjetike, ekonomia ju bën ballë këtyre presioneve”, thotë Selami Xhepa.
“Shqipëria nuk duhet të kishte varësi kaq të madhe nga tregjet e huaja, ku 40% e energjisë për konsum merret nga importi, kjo është për të ardhur keq duke pasur parasysh të gjitha burimet hidrike që ne kemi, klimën e përshtatshme për të krijuar panele fotovoltaike”, thotë Danaj.
“Diversifikimi është çelësi dhe zgjidhja e vetme që biem dakord të gjithë në këtë sektor. Shqipëria dallohet për zhvillimin e energjisë diellore apo ajo eolike”, pohon Lorenc Gordani.Nga viti 1936 kur u ndërtua hidrocentrali i parë në vend në Vithkuq që tanimë nuk është funksional, e deri në fund të 2020 në Shqipëri sipas ERE, kanë prodhuar energji 216 centrale private.
Pavarësisht numrit të madh të hidrocentraleve 80% të prodhimit në vend e sigurojnë HEC-et e ndërtuara mbi lumin Drin, Vau i Dejës, Fierzë dhe Koman. Shqiptarja.com
