“50 mijë lekë të bonusit s’janë asgjë”- Deputetja e PS zbulon skemën: Si do i rrisim pensionet

Deputetja e Partisë Socialiste, Pranvera Resulaj, ka pranuar se 50 mijë lekë të vjetra të bonusit që ofron qeveria për të moshuarit, nuk ia ndryshojnë jetën atyre.

Komentet Resulaj i bëri në emisionin “Off the Record” me gazetarin Andrea Danglli në A2 CNN, ku tha se pensioni nuk është një skemë sociale, por kontributive.

Ajo shtoi se mënyra e vetme për rritjen e pensioneve është rritja e fuqisë blerëse të pensionistëve, e cila sipas saj, mund të realizohet me 2 mënyra, përmes indeksimit dhe përmes bonusit financiar.

“Do të ishte shumë e thjeshtë që të ngrihej mazhoranca sot e të premtonte dyfishim të pensioneve. Skema do rishikohet, por skema nuk është vetëm çështje vullneti politik, është çështje shumë teknike. Ne nuk duam t’i lëmë një barrë të madhe brezit të ri. Pensioni nuk është një skemë sociale, por kontributive. Ne punojmë sot dhe marrin pension ata që pensionojnë sot.

Kështu që në bazë të kontributeve që derdhim, ashtu duhet të marrim mbrapsht edhe përfitimin. Kjo skemë është prishur. Që nga ’93 e në vazhdim janë parë të gjithë ata që kanë dalë në pension në atë momentin e reformës dhe jo ata që kanë dalë pas. Tani ne kemi që nga 2014 që vendosi një lloj ekuilibri e barazie duke rritur moshën e pensionit. Pensionistët që janë nuk pop resin, por po trajtohen. Ne duhet të rrisim fuqinë blerëse të pensionistëve.

Jo domosdoshmërisht rritja e pensioneve. Unë ju thashë më parë hajde dyfishojmë pensionet, sepse 50 mijë lekë të vjetra një pensionisti nuk mund t’ia ndryshojnë jetën. Por prandaj them që bonusi është i nevojshëm dhe nuk duhet injoruar. Ka tre mënyra për të rritur fuqinë blerësve të pensionistëve. Një mënyrë është indeksimi dhe tjetra është bonusi financiar”, tha Resulaj.