50 kilogramë kanabis u sekuestrua gjatë orëve të natës në tokën greke, në pikën kufitare të Kakavijës.
Sipas policisë helene, lënda narkotike ishte e fshehur në disa vende të ndryshme në tavanet e brendshme të autobusit të linjës Sarandë-Athinë, i markës “Scania” dhe targa të Sarandës.
Policia thotë se kishte informacion për mbërritjen e lëndës narkotike. Në pranga u vu drejtuesi i autobusit, një shtetas shqiptar nga Saranda.
Dëshmitarë okularë thanë se drejtuesi i automjetit u deklaroi agjenteve të antidrogës që e arrestuan se nuk kishte lidhje me ngarkesën e drogës, por nuk mundi të justifikojë sesi ajo ishte fshehur në autobus, përcjell Tch.
Shoferi do t’i dërgohet gjykatës së Janinës për masë sigurie, ndërsa udhëtarët u dërguan në destiancionin e tyre me një mjet tjetër të kompanisë.
Një ditë më parë, autoritetet shqiptare të doganës së Kakavijës prangosën dy shoferë të një linje tjetër autobusësh nën akuzën e transportimit të lëndëve narkotike. Atyre iu gjetën 8.7 kilogramë kanabis në tavanet e ajrimit të autobusit të linjës Tiranë-Athinë.
