Konviktet e kampusit universitar të Qytetit Studenti në Tiranë, do t’u nënshtrohen një projekti rinovimi sipas parimit të eficencës energjitike.
Komisioni i Ekonomisë miratoi me konsesus një marrëveshje granti falas nga qeveria gjermane prej 4,5 milionë euro që do të përdoret pikërisht për të rritur eficencën në këto ndërtesa. Sipas autoriteteve do të kursehet deri në 15 përqind energji dhe pritet që parimi i eficencës së energjisë të përfshijë çdo ndërtim të ri në Shqipëri, privat apo publik.
“Të kursesh nga izolimi dhe nga mënyra e re e konceptimit të ndërtimit dhe kur të hyjë në fuqi ligji i ri i performancës së ndërtesave, çdo ndërtim i ri do të bëhet në kushtet e eficencës së energjisë. Sot humbasim 14-15 përqind të energjisë për shkak të ndërtimeve jo eficente sa i përket konsumit energjitik”, tha para Komisionit, zv.ministri i Energjitikës, Ilir Bejtja.
Projekti është planifikuar të fillojë këtë vit dhe do të zgjasë deri në 2018. Zbatuese do të jetë Ndërmarrja e Qytetit Studenti nr.1 në Tiranë./TCH/a.k
