Asnjë objekt i ndërtuar pas qershorit të 2014 nuk do të përfshihet në proces legalizimi. Kreu i ALUIZNI-t, Artan Lame, bëri edhe një herë të qartë dje se nuk do të pranohen kërkesat e mbërritura nga ata që kanë ndërtuar pas këtij afati.
Bëhet fjalë për rreth 45 mijë familje, të cilat nuk kanë respektuar kriterin kohor duke u përjashtuar automatikisht nga procesi.
Të paktën deri më tani, sa kohë nuk ka ende një hapë- sirë ligjore që lejon përfshirjen e tyre. Sipas të dhënave zyrtare, nga viti 2006 deri në 2015 kanë plotësuar formularin e aplikimit rreth 450 mijë familje.
Në vetëdeklarim, sipas Lames, janë përfshirë edhe një numër objektesh të cilat nuk mund të përfshihen në legalizim për shkak të kohës së ndërtimit të tyre. Kjo shifër varion nga 7-10% të vetëdeklarimeve, që do të thotë rreth 45 mijë. Po ashtu ka pasur edhe shumë qytetarë, të cilët kanë deklaruar më shumë se një herë. Në këto kushte numri i ndërtimeve pa leje që janë përfshirë në proces legalizimi në periudhën 2006-2015 është 320 mijë objekte.
Edhe pse nuk mund të flitet për numra, nga procesi do të skualifikohen edhe shumë familje, të cilat kanë ndërtuar në shkelje të kritereve të vendosura. Të tillë janë ata që kanë ndërtuar mbi kolektorë, në zonat e mbrojtura, zonat që rrezikohen nga përmbytjet etj. Për këto raste do të shikohet mundësia e dëmshpërblimit.
LEJET
I ftuar në një seancë dëgjimore në Komisionin e Veprimtarive Prodhuese, kreu i ALUIZNI-t prezantoi të dhënat e deritanishme nga procesi i formalizimit. Sipas Lames, nga nisja e procesit në 2006 dhe deri më tani janë pajisur me leje 88 mijë familje, ndërkohë që synohet që në periudhën e mbetur shifra të shkojë 100 mijë.
Pra, do të jenë rreth 12 mijë ndërtime të cilat do të legalizohen rishtazi në tremujorin e mbetur të këtij viti. Pjesa dërrmuese e lejeve janë lëshuar në tri vitet e fundit, rreth 66 mijë. Kryetari i komisionit, Eduard Shalsi, ngriti shqetësimin se sa prej këtyre lejeve të dhëna kanë përmbyllur procesin e regjistrimit në Hipotekë.
Duke mos dhënë shifra se sa prej tyre kanë marrë tapi, Lame tha vetëm se procesi po ecën normalisht. Janë pikërisht ndryshimet e miratuara së fundmi ato që pritet t’i japin një kthesë procesin, duke e orientuar në shinat e zgjidhjes. Duke nisur nga ky muaj e në vijim, aplikimin për tapi do ta kryejë ALUIZNI. Qytetarët do të njoftohen vetëm kur certifikata e pronë- sisë të jetë gati dhe ata duhet ta tërheqin.
DISKUTIMET
Gjatë seancës në Kuvend, deputetët ngritën shqetë- simin për korrupsionin në zyrat e ALUIZNI-t, tenderin për matjet në terren dhe për kompensimin e pronarëve. Sipas deputetes së PD-së, Mimoza Hajdarmataj, është e pajustifikueshme që ALUIZNI tenderon kompani private për të kryer punë të përfunduara, shkruan Panorama.
Por, sipas Lames, asnjë nga matjet e kryera më parë nuk janë të vlefshme duke diktuar domosdoshmërinë e ribërjes nga fillimi. Lame u ndal edhe te rastet e korrupsionit, duke paralajmëruar largim nga puna për punonjësit që kërkojnë ryshfet në këmbim të lejes. Ndërsa për pronarët e tokës, ai nënvijëzoi se nga viti 2014 deri më tani janë adresuar 1.7 miliardë lekë për kompensimin e tyre./a.m.
