42, nga 61 bashkitë në territorin e vendit nuk kanë shërbim zjarrëfikës, por Qeveria ka gjetur një zgjidhje mjaft origjinale për mbulimin e këtij boshllëku. Një Vendim i Këshillit të Ministrave i datës 12 tetor, përcakton se në rast zjarri, këto bashki, mund t’i marrin ato me qira nga 19 njësitë e tjera që kanë shërbim zjarrëfikës për 15 mijë lekë në orë.
“Tarifa e shërbimit për shuarjen e zjarreve apo për shpëtimin, në raste aksidentesh dhe fatkeqësish të tjera, ofruar nga bashkitë e pajisura me stacione të këtij shërbimi në territorin e bashkive që nuk kanë stacione të mbrojtjes nga zjarri dhe shpëtimi, është pesëmbëdhjetë mijë lekë për orë pune”, thekson vendimi i Qeverisë.
Këshilli i Ministrave përcakton gjithashtu se për efekt të përllogaritjes së kostove të shërbimit të ofruar nga bashkia me zjarrëfikës, koha e ndërhyrjes llogaritet nga momenti i daljes së personelit nga stacioni zjarrfikës dhe përfundon me largimin e tij nga vendi i ngjarjes.
Shumat e arkëtuara nga bashkitë që kërkojnë ndërhyrje për shuarjen e zjarreve apo në raste aksidentesh e fatkeqësish të tjera, do derdhen në llogaritë e bashkive që kanë ofruar shërbimin dhe përdoren vetëm për financimin e veprimtarisë së shërbimit të mbrojtjes kundër zjarrit të bashkisë.
ma.me
