Japonia po përballet me një valë të fortë të nxehti, ndërsa temperatura në qytetin jugperëndimor të Fukuokës arriti të mërkurën në 40.4 gradë Celsius, duke shënuar ditën e dhjetë radhazi me temperatura ekstreme.
Sipas Kyodo News, temperatura rekord u regjistrua në lagjen Hakata të Fukuokës. Moti i nxehtë është shkaktuar nga një zonë e gjerë me presion të lartë, ndërsa qyteti është ndikuar edhe nga ajri i nxehtë dhe i lagësht i sjellë nga një tajfun pranë rajonit.
Vala e të nxehtit ka shkaktuar pasoja të rënda në shëndetin publik. Më shumë se 41 mijë persona u shtruan në spital në të gjithë Japoninë për shkak të goditjes nga nxehtësia vetëm gjatë muajit korrik, ndërsa të paktën 79 persona humbën jetën.
Sipas të dhënave të Agjencisë së Menaxhimit të Zjarrfikësve dhe Fatkeqësive të Japonisë, mbi 60% e personave të shtruar në spital ishin 65 vjeç ose më të mëdhenj.
Autoritetet japoneze i klasifikojnë ditët me temperatura 40 gradë Celsius ose më shumë si “kokushobi”, ose “ditë jashtëzakonisht të nxehta”, ndërsa temperaturat mesatare të verës në vend kanë shënuar rritje të vazhdueshme vitet e fundit.
