Nga Flogert Muça/
Dita e djeshme ishte një ditë e trishtë për grabitësit e 3 dhjetorit të 2015 dhe 9 shkurtit të 2017. Të cilët u arrestuan në kohë rekord nga policia e cila mbrëmë u përshëndet nga mbarë opinioni publik duke rikonfirmuar edhe njëherë sondazhin ku doli institucioni më i besuar nga shqiptarët.
Siç dhe deklaroi mbrëmë për mediat Policia “Drejtoria e Policisë Tiranë, Drejtoria Kundër Krimeve të Rënda në Drejtorinë e Policisë së Shtetit në bashkëpunim dhe me prokurorinë e Rrethit Gjyqësor Tiranë, në kuadër të operacionit “Patriot”, pas hetimeve intensive, zbuluan , dokumentuan dhe arrestuan autorët e dy grabitjeve të vlerave monetare bankare në transport, në aksin Tiranë- Rinas.”
Arrestimi i 4 prej grabitësve dhe identifikimi i 2 të tjerëve që mesa duket i kanë orët e numëruara, është një lajm i mirë për çdo qytetar normal. Për cilindo që, që në vegjëli ka mësuar se policia ka si mision përballjen me krimin dhe se krah saj duhet të jetë secili prej nesh, çdo qytetar.
Por, 14 shkurti nuk ka qenë një ditë e mirë për grabitësit të cilët nuk mundën të festonin mbrëmë më dashurinë e tyre, paranë. Nuk ishte arrestimi i tyre lajm i mirë as për opozitën. E kur themi opozitën nuk e kemi më fjalën vetëm për Partinë Demokratike, por për të gjithë ata që për kapital politik sulmojnë Policinë e Shtetit, duke tentuar ta bëjnë të pabesueshme në sytë e opinionit publik e rrjedhimisht, duke i dhënë krah krimit.
Natyrisht në vijë të parë të të zhgënjyerve dje ishte ish-kryeministri Berisha, i cili teksa mbyllte fjalën e tij kilometrike në Kuvend ditën e enjte kur ndodhi grabitja, tha “Ka ndodhur një vjedhje në Rinas, vjedhjen e ka kryer Edvini dhe Sajmja”. Dje gota e verës duhet t’i jetë derdhur doktorit kur ka lexuar titrat në TV se grabitësit u arrestuan. Kjo jo sepse i bëhet vonë për paratë e bankës, por sepse i bie kauza dhe del sërish bllof, siç rëndom tanimë ndodh.
I dyti që mbrëmë është trishtuar e të cilit policia duhet t’i kërkojë ndjesë publike,është kryetari i PD, Lulzim Basha. “Qeveria vodhi bankën“, u shpreh ai pas grabitjes. Basha ka 3 vjet e 6 muaj që sulmon gjithë ditën Policinë e Shtetit. E thënë ndryshe, i gjithë aksioni politik i Bashës është ngritur duke sulmuar policinë. Operacioni i djeshëm i policisë i rrëzoi atij edhe njëherë të gjithë punën 3.5 vjeçare. Si ai dhe doktori nuk e uruan policinë për punën, por natyrisht që kanë marrë mjaft falenderime nga krimi në këto 4 vjet. Sepse duke sulmuar policinë i kanë dhënë një dorë të mirë krimit.
I treti që u zhgënjye është padyshim Blushi. Duhet t’i jëtë grisur letra në të cilën po shkruante fjalimin kundër Policisë për të enjten në Kuvend. Duhet t’i jetë prishur gjithë fabula e cila dhe pse e struturuar më bukur ndoshta, ka përmbajtjen e njëjtë me atë të doktorit. “Qeveria e grabiti bankën” tha ai sapo ndodhi grabitja. Duke u bërë si zakonisht palë me doktorin e Bashën.
I fundit i cili u zhgënjye mbrëmë nga arrestimi i grabitësve është padyshim Ylli Manjani. Ylli që dha verdiktin e tij prej juristi se “Policia i çoi thasët me para në qeveri”. Rezulton se paratë janë gjetur të groposura diku në Vlorë.
Pra të 4 protagonistët që dhanë verditke rreth vjedhjeve do e mbajnë mend gjatë këtë Shën Valentin. I cili ju rrëzoi jo vetëm verdiktin, por edhe kauzën e tyre publike duke i nxjerrë ata cullak përpara opinionit publik, i cili pavarsisht akuzave e baltës, e kishte besimin ndaj policisë mbi çdo institucion tjetër.
Ne do i mbajmë mend që të 4-t për papërgjegjshmërinë e tyre kur bëjnë deklarata publike dhe si muskutierët që i kanë rënë policisë pa mëshirë. Dhe kur policia triumfon mbi krimin, nuk kanë burrërinë as ta përgëzojnë atë./lexo.al
