Policia italiane në bashkëpunim me atë kosovare arrestoi 4 persona të akuzuar për terrorizëm dhe nxitje të gjuhës së urrejtjes. Të dhënat e reja të siguruara nga mediat italiane flasin për organizimin e një atentati ndaj papa Franceskut nga grupi terrorist.
Operacioni blic, i koduar me emrin “Van Damme” është zhvilluar në disa qytete të Italisë dhe Kosovës.
Hetimet e kryera nga zyra e parandalimit të akteve terroriste në Itali kanë zbuluar kontaktet e vendosura mes organizatave terroriste që përmes internetit dhe rrjeteve sociale propagandonin ideologjinë xhihadiste.
Ai qe konsiderohet si “truri” i grupit, një qytetar kosovar i cili ka jetuar për disa kohë në Itali, u arrestua në Han të Elezit në Kosovë, ndërsa tre të tjerë u arrestuan në Itali. Sipas mediave italiane, dy prej të arrestuarve janë vëllezërit Samet dhe Ismail Imishiti.
Sipas mediave italiane, nga të dhënat e siguruara nga hetuesit dyshohet se ekziston një kërcënim edhe ndaj Papa Françeskut. “Ky Papë do të jetë i fundit”, kanë thënë gjatë bisedave telefonike të përgjuara personat e arrestuar.