Katër minatorë u shpëtuan sot pasi u bllokuan për 36 ditë në më shumë se 200 metra thellësi në një minierë gipsi në provincën Shandong, në pjesën lindore të Kinës, njoftoi sot agjencia zyrtare e lajmeve “Hsinhua”.
Operacioni i shpëtimit zgjati rreth dy orë, katër burrat u ngjitën në sipërfaqe njëri pas tjetrit në sajë të një kapsule të ngushtë, sipas televizionit publik “CCTV”.
Minatorët mundën të lokalizoheshin në sajë të gërmimit të një tuneli nga forcat e shpëtimit. Më pas ata u mbështollën me batanije dhe u dërguan në spital.
Ata mbetën të bllokuar në pjesën e brendshme të galerisë nga shembja e saj më 25 dhjetor, për shkaqe ende të panjohura, në këtë minierë që ndodhet në Pingyi, dhe vetëm pesë ditë më pas më datë 30 u zbuluan shenjat e para të jetës, sqaroi agjencia zyrtare e lajme “Hsinhua”.
