Kryegjyshi Botëror Bektashian, Haxhi Dede Baba Mondi, ka përcjellë mesazhe për paqe, dashuri dhe mirësi gjatë konferencës ndërkombëtare jubilare kushtuar 35-vjetorit të rihapjes së Kryegjyshatës Botërore Bektashiane. Në fjalën e tij, Baba Mondi e cilësoi këtë përvjetor si një moment të rëndësishëm për komunitetin bektashian, duke vënë theksin te ruajtja e traditës, trashëgimisë shpirtërore dhe vlerave të përcjella ndër breza.
“Kujtojmë 35-vjetorin e rihapjes së Kryegjyshatës Botërore Bektashiane. Kjo është një ceremoni e shenjtë dhe një ditë e veçantë për ne bektashinjtë, të cilët po mbajmë gjallë dritën e Haxhi Bektashit, dritën e të parëve tanë, të cilët janë munduar të na udhëheqin me dashuri, paqe e mirësi”, u shpreh ai.
Konferenca jubilare shënoi njëkohësisht edhe përkujtimin e tre momenteve të rëndësishme për historinë e Kryegjyshatës Botërore Bektashiane: 35-vjetorin e rihapjes së saj, 15-vjetorin e drejtimit nga Haxhi Dede Baba Mondi dhe 11-vjetorin e inaugurimit të kompleksit kulturor Odeon.
Sipas Baba Mondit, këto përvjetorë nuk përfaqësojnë vetëm data historike, por dëshmojnë rrugëtimin e komunitetit bektashian ndër vite. “Po e mbyllim këtë konferencë ndërkombërare jubilare e cila zhvillohet në një ditë të vecantë për historinë e Kryegjyshatës Botërore Bektashiane duke përkujtuar 3 momente të rëndësishme: 35-vjetorin e rihapjes së kryegjyshatës; 15-vjetorin si drejtues i kryegjyshatës dhe 11 vjetorin e inaugurimit të kompleksit kulturor odeon. Kjo ditë nuk është vetëm ditë historike, por dëshmi e gjallë e një udhëtimi të gjatë të ringriitjes, përkushtimit dhe besimit përmes kutesave dhe dëshmive”, theksoi Kryegjyshi Botëror Bektashian.
Në fjalën e tij, Baba Mondi nënvizoi rëndësinë e ruajtjes së trashëgimisë shpirtërore dhe kulturore bektashiane, duke e cilësuar këtë përvjetor si një moment reflektimi mbi të kaluarën, por edhe si një mundësi për të përcjellë te brezat e rinj mesazhet e paqes, dashurisë, tolerancës dhe mirësisë.
