Një histori me shume se tronditëse është rrëfyer në studion e emisionit “ Me zemër të hapur” të autores Evis Ahmeti në “News24”. 34-vjecarja me inicialet F.S tregon se si 16 vjet më parë denoncoi në polici babanë për vrasjen e foshnjës së tij 2-muajshe dhe nënën për moskallëzim krimi.
Pas burgosjes së prindërve, dajat e martuan me një emigrant shqiptar në Greqi, të cilin nuk e njihte. Jetesa me të ishte e pamundur dhe vajza u detyrua t’i japë fund kësaj martesë. E vetme në mes të katër rrugëve, në vend të huaj dhe pa asnjë njohuri për gjuhën 18-vjeçarja u bë aso kohe pre e abuzimeve.
Pas rehabilitimit në qendrat kundër trafikimit, F.S njihet dhe dashurohet me një djalë, por edhe ky do të bëhej tutor i saj për një vit. Ai e shfrytëzoi si prostitutë duke e nxjerrë në rrugë. Kur e reja nuk ngjallte më interes për klientët për shkak të shtatzënisë, ai e hoqi qafe në një mënyrë të tmerrshme, e hodhi në një kazan mbeturinash.
Sot ka një djalë si fryt i abuzimit seksual, ndërsa të afërmit i kanë mbyllur derën. Nëna, e cila bashkëpunoi në vrasjen e fëmijës së saj, sot ka turp nga nderi i prekur i së bijës. Pasi jetoi 4 vjet në qendrën e grave të trafikuara në Linzë, F.S sot 34-vjeçe jeton në një shtëpi me qira në Tiranë, ndërsa i biri shkon në një kopsht të kryeqytetit.
Apelit të saj për ndihmë i është përgjigjur agjencia “Stop krimi”, ndërkohë që ajo kërkon një pune që të mund të rrisë me dinjitet të birin 5-vjeçar.
