Kontrolli i Lartë i Shtetit ka kallëzuar ish-administratorin e CEZ Shpërndarje dhe dy ish-drejtues të kësaj kompanie, pasi dyshohet se kanë shkaktuar një dëm ekonomik prej 32 039 438 euro.
Sipas njoftimit të KLSH-së mësohet se është shkaktuar një dëm prej 9,727,223 euro nga blerja e energjisë elektrike gjatë periudhës janar – korrik 2014. Gjithashtu është shkaktuar një dëm prej 11,082,68 euro nga mbifaturimi i konsumatorëve me pasojë uljen artificiale të humbjeve teknike dhe 4,359,882 euro nga procedurat e blerjes së materialeve dhe pajisjeve elektrike.
Sipas njoftimit në fjalë, nga auditimi i blerjes së energjisë elektrike, për periudhën janar – korrik 2014, nga CEZ Shpërndarje SHA, rezultoi se është shkaktuar një dëm ekonomik në vlerën 2, 96 miliard lekë, ose 21,238,860 euro, si rrjedhojë e blerjes së energjisë elektrike me çmime më të larta se ato të tregut.
Nga moszbatimi i rregullt i procedurave të blerjes së energjisë elektrike për mbulimin e humbjeve në sistem, për periudhën janar-korrik 2014, nga shoqëria “CEZ Shpërndarje” Sha, është shkaktuar një dëm ekonomik në vlerën 9,727,223.4 euro. Konkretisht blerja e energjisë elektrike është kryer me çmime shumë më të larta se çmimet e tregut (përfshirë dhe kostot të transportit të energjisë), nga 7.94 euro deri në 13.12 euro për Mwh.
Po ashtu, shkelje janë vënë re dhe lidhur me mbifaturimin e konsumatorëve me pasojë uljen artificiale të humbjeve teknike. Nëpërmjet uljes artificiale të humbjeve teknike është shkaktuar një dëmtim i interesave të ligjshme të shoqërisë “KESH” sha dhe buxhetit të shtetit për 2014, në vlerën 11,082,687 euro.
Konkretisht për vitin 2014 u konstatua se në mënyrë artificiale janë ulur humbjet teknike, veprim i cili është kryer me fatura të dyshimta (mbifaturim, keqfaturim, faturim të abonentëve pa adresë si dhe abonentë që nuk kanë arkëtuar asnjëherë etj), si pasojë e të cilës i është krijuar një dëm ekonomik shoqërisë “KESH” sh.a dhe buxhetit të shtetit në vlerën 11,082,687 euro. Ky faturim është bërë në mënyrë abuzive dhe të pasaktë, pasi reflekton një sasi të pa konsumuar të energjisë elektrike, por edhe një faturim fiktiv me abonentë që nuk kanë arkëtuar asnjëherë (të cilët rezultojnë aktiv nё sistemin e faturimit, ndoshta nuk ekzistojnë etj).
Po ashtu, nëpërmjet blerjes së energjisë elektrike nga tre kompani të lidhura ndërmjet tyre (një kompani mëmë dhe dy bija), për mbulimin e humbjeve te energjisë në sistemin e shpërndarjes për periudhën korrik 2014-mars 2015, është shmangur konkurrenca, duke sjellë si pasojë një dëm ekonomik për llogari të shoqërisë CEZ Shpërndarje sha dhe më pas për OSHEE sha, në vlerën 428,950 euro..etj
