Bindja Demokratike ankimoi sot procesin elektoral të 30 qershorit në të gjitha ato zona zgjedhore, ku ajo konkurroi me kandidatë për kryetarë ose këshilltarë bashkie. Dosja ankimore u dorëzua sot në mesditë në Komisionin Qendror të Zgjedhjeve nga anëtari i bordit të përkohshëm përfaqësues, Fabian Topollaj.
Zoti Topollaj tha në një prononcim të shkurtër për shtypin se objekt i ankimimit janë vetëm ato qendra votimi dhe zona zgjedhore, ku BINDJA DEMOKRATIKE, u lejua të marrë pjesë në garë, ndërkohë që të njëjtat probleme me zgjedhjet me siguri që kanë ekzistuar në të gjithë territorin. Siç kemi njoftuar edhe më parë, BINDJES DEMOKRATIKE iu refuzuan listat e saj për këshilltarë bashkiakë në 20 zona zgjedhore, me pretendimin ekstraligjor se ato duhet të përmbanin numrin e plotë të këshilltarëve.
Sipas Topollajt, ankimi synon të provojë që zgjedhjet e 30 qershorit u administruan keq dhe qëllimisht nga përfaqësuesit e vetëm të njërës palë, në këtë rast të Partisë Socialiste.
Vendimi për të ankimuar zgjedhjet erdhi pas raportimeve të vëzhguesve tanë në terren, të cilët ishin e vetmja mundësi që ne patëm për të mbikqyrur procesin. Rreth 3 javë më parë ne kërkuam që të kishim komisionerë dhe numërues në ato zona zgjedhore ku kandidonim, por kërkesa jonë u shpërfill dhe nuk u mor kurrë parasysh nga KQZ. Kjo i shtoi dyshimet se prania e përfaqësuesve tanë në qendrat e votimit dhe në tavolinat e numërimit ishte shqetësim për njerëzit e qeverisë.
Në konstatimet e vëzhguesve të BINDJES DEMOKRATIKE theksohet se ka pasur shtim fiktiv të numrit të përgjithshëm të votuesve, si dhe ndryshim të votave në tavolinat e numërimit në favor të Partisë Socialiste dhe të aleatëve të saj.
Zoti Topollaj i ftoi publikisht anëtarët e KQZ dhe Partinë Socialiste që të bënin transparencën e zgjedhjeve të 30 qershorit, në rast se ata janë të sigurt se nuk ka pasur deformim të vullnetit të zgjedhjeve.
10 vjet më parë, tha ai, Edi Rama u bë i famshëm me pretendimin e vet “hap kutitë, ose largohu!”, të cilën e shndërroi në një kauzë disavjeçare për të justifikuar humbjen e vitit 2009. Ne nuk po i themi që të ikë, por e kemi më të butë kerkesën “Hap kutitë, ose pranoje, që ke manipuluar.”
g.kosovari
