Prej 1 Qershorit Shqipëria duhet të ishte pa qese plastike. Kanë kaluar tre muaj nga hyrja në fuqi e ligjit që ndalon qeset e holla plastike, megjithatë ende i shohim të përdoren, kryesisht në tregjet e vogla të fruta-perimeve.
“Problemi kryesor rrjedh dhe buron nga tregjet informale. Nuk ka qenë qëllimi të vendosim gjoba, kemi pasur synim të rrisim ndërgjegjen e qytetarëve, tregtuesve dhe qytetarëve. Në raport me numrin e inspektimeve, gjobat nuk janë shumë të larta”, tha Elvis Tosuni, këshilltar në Ministrinë e Turizmit dhe Mjedisit.
Por sipas Ministrisë së Turizmit dhe Mjedisit shumë shpejt do të ketë gjoba të menjëhershme, që nisin nga 500 mijë Lekë.
“Që do të thotë menjëherë në konstatimin e një shkeljeje nga ana e inspektoriateve nuk do ketë më paralajmërime, por masë administrative me gjobë.”
Megjithatë ka edhe një realitet tjetër. Një pjesë e qytetarëve janë ndërgjegjësuar dhe refuzojnë qeset e holla. Ata kanë zgjedhur të përdorin çantat prej cope apo kartoni.
Sipas vlerësimit të ekspertëve kjo mënyrë ekologjike dhe miqësore me mjedisin pritet të reduktojë ndotjen me deri 8%.
